අපගේ මවුබිම නව උපතකට සූදානම්

Click to
follow

‘අපගේ මව්බිම නව උපතකට සූදානම් වෙමින් තිබෙනවා‘පසුගිය සති කිහිපයේ ආස්වාදනීය ප්‍රතිචාරවලට ගරුකරන අතර නව සමාජ විප්ලවයකට එක්ව ඉදිරියට යැමට එක්වන ලෙස ඹබට ඇරයුම් කරනවා යැයි නව ප්‍රජාත්න්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතා ප්‍රකාශ කරයි.

වැඩිදුරටත් අදහස් දැක්වූ සජිත් ප්‍රේමදාස ඇමැතිවරයා-

පසුගිය සති කිහිපයේ මම මේ රටේ බොහෝ මැතිවරණ බල ප්‍රදේශවල රැස්වීම් 125කට වඩා සහභාගී වුණා. විවිධ වෘත්තීයවේදීන්, ජන කණ්ඩායම් හා නායකයින්, සමාජ ක්‍රියාකාරීන් හා ආගමික නායකයින් සමග පුළුල් හා ගැඹුරු සංවාදයක නියැලෙන්නට මට හැකියාව ලැබුණා. එහිදී මට හැඟී ගියා අපගේ මව්බිම නව උපතකට සූදානම් වෙමින් සිටින බව. නව වෙනසකට අපේක්ෂාවන් දල්වාගෙන සිටින බව. එමෙන්ම අපගේ ජනතාව පැවතුනු පවුල්වාදී, ගජමිතුරුවාදී දූෂිත දේශපාලනය වෙනස් කිරීමට අධිෂ්ඨාන කරගෙන ඇති බව.

ශ්‍රී ලංකාවේ සිව් කොනේම ජනතාව මා සමග එක් වෙද්දී විශේෂයෙන්ම කාන්තාවන් හා තරුණයින් මගෙන් ඇසූ ප්‍රශ්න ගණනාවක් තිබෙනවා. මොනවාද ඔබ අපට ලබා දෙන අවස්ථාවන්, කවර ආකාරයක රැකියා අවස්ථාවන් අපට ලැබෙයිද, අපගේ ජීවිත දියුණු කරගන්නට ජීවන බර අඩුකරගන්නට ඔබේ ප්‍රතිපත්ති මොනවාද?

නමුත් තවත් එක් වැදගත් ප්‍රශ්නයක් ඔවුන් සියලු දෙනාම මගෙන් ඇසුවා, ඒ තමයි දේශපාලකයන්, විශේෂයෙන්ම 225ක් වූ පාර්ලිමේන්තු මන්ත්‍රීරුන් අපව තව වතාවක් රැවටීමට ලක් කරයි ද? ඔවුන් නැවතත් පැරණි පුරුදු ක්‍රමයටම රට සූරාකමින් තමන්ගේ පවුල් තර කරගනියි ද? මේ දූෂිත ක්‍රමය වෙනස් කර ගැනීමට ඔබට ඇති වැඩ පිළිවෙළ හා අපට දෙන සහතිකය කුමක් ද?

මුළු රටටම ඇති බලගතු පොදු අපේක්ෂාව නම් මේ කුණු වුණු දූෂිත දේශපාලන හා සමාජ ක්‍රමය වෙනස් කරගන්නේ කෙසේ ද යන්න බව මම තේරුම්ගත්තා.

ප්‍රශ්න විසඳීමට කමිටු දැමීමෙන්, වාඩිවී සිටීමෙන්, පොරොන්දු ලබා දීමෙන් හෝ වැඩි වැඩියෙන් පොරොන්දු ලබා දීමෙන් හෝ වැඩි වැඩියෙන් මුදල් යෙදවීමෙන් මේ සැඟවුණු දූෂිත ක්‍රමය වෙනස් නොවන බව මමද විශ්වාස කරනවා. ඒ සඳහා විසදුම දේශපාලන බලය හොබවන පුද්ගලයනුත්, දේශපාලන බලය හොබවන ආකාරයත් වෙනස් කරන එක කියලයි මම හිතන්නෙ.

අපගේ ජනතාව අව්වෙන් වැස්සෙන් හා පරිසරයෙන් බැටකද්දී එකතැන පල්වෙන ආර්ථික ප්‍රතිපත්ති විසින් සූරාකද්දී, මහජනතාව සිය ගරුත්වය අහිමිවී වේදනාබරව සිටියදී සුළු පිරිසක් විසින් පවුල්වාදී ලෙසත්, ගජමිතුරුවාදී ලෙසත්, රටේ සාරය උරාගෙන, සතුටින් සිටීමේ දුෂ්ඨ ක්‍රමය අවසන් කළ යුතුව තිබෙනවා. එය කළ හැක්කේ ඔබටයි! එළඹෙන 16 වැනිදා ඔබගේ වටිනා ඡන්දයෙන් මේ දූෂිත, කුණු වුණ දේශපාලන ක්‍රි යාවලිය අවසන් කර සමාජ විප්ලවයකට, සුභ පෙරළියකට පෙරමුණු ගත හැක්කේ ඔබටමය.

මම ඔබගේ ලොක්කා නොව, නායකයා හා සේවකයා වීමට සූදානම් බවට මම ඔබට ප්‍රතිඥාවක් දෙනවා.

පැරණි පවුල්වාදී, ගජමිතුරුවාදී දේශපාලනය අවසන් කළ යුතුයි. පැරණි දූෂිත දේශපාලනය අවසන් කළ යුතුයි. එමෙන්ම බියකරු හා ප්‍රචණ්ඩ ලෙස බලයේ එල්ලී සිටීමේ ඒකාධිපති දේශපාලනය ද අවසන් කළ යුතුයි. මේ සියල්ල පසුපස ඇති බල තණ්හාව තීරණාත්මකව අවසන් කළ යුතුයි.

ශ්‍රී ලංකාව භූගෝලීය ලෙස වටිනා පිහිටීමක් ඇති රටක්. ශ්‍රී ලංකාව ජීවමය අස්වැන්නෙන් පිරීගිය නිල්ල පිරුණු රටක්. ශ්‍රී ලංකාව කුසලතාවයෙන්, නිපුණතාවයෙන් පිරීගිය මානව සම්පත් සහිත රටක්.

මගේ එකම අභිලාෂය කුඩා කල්ලියක බල තණ්හාවට මේ සුන්දර හැකියා පූර්ණ රට බිලි නොදී නිපුණතාවයට, කුසලතාවයට මුල් තැන දී ආරක්ෂිත, විනයගරුක, නිදහස්, සමෘද්ධිමත් රටක් බවට මේ රට පත්කිරීම කියලා මම ඔබතුමන්ලට ප්‍රකාශ කරන්න කැමතියි.

අපගේ ආගමික විශ්වාසයන් බෞද්ධ වේවා, හින්දු වේවා, ඉස්ලාම් වේවා, කිතුණු වේවා අපගේ ප්‍රධාන සතුරා වන්නේ මේ බල තණ්හාවයි. කුඩා කල්ලියක් විසින් මහ ජනතාවගේ අපේක්ෂාවන් සිර කර ඇති බල තණ්හාවයි. මගේ සමාජ විප්ලවය ඔබව එයින් නිදහස් කර ගැනීම සඳහා ය කියන එක මම පැහැදිලිවම ඔබට ප්‍රගකාශ කරන්න ඕන.

වරක් බුදුන් වහන්සේ මෙසේ දේශනා කලා.

‘‘පාලකයා, එනම් රජු යුක්ති ගරුක හා ධාර්මික වේ නම් ඇමැතිවරු යුක්ති ගරුක හා ධාර්මික වෙති. ඇමතිවරු යුක්තිගරුක හා ධාර්මික වේ නම් රාජ්‍ය නිලධාරීන් යුක්තිගරුක හා ධාර්මික වෙති. එවිට සකල ජනතාවම යුක්ති ගරුක හා ධාර්මික වෙති. එවිට පරිසරය ද යුක්තිගරුක හා ධාර්මික වේ.’’

මගේ අරමුණ මේ යුක්ති ගරුක හා ධාර්මික වෙනස පාලනයේ මුදුනින්ම එනම් ජනාධිපතිධූරයෙන්ම ආරම්භ කිරීම සහ බල කාමය මුලිනුපුටා දා පරාර්ථකාමය රටට ආදර්ශයක් ලෙස ලබා දෙන්න කියන එක මම බොහොම අධිෂ්ඨානශීලීව ප්‍රකාශ කරන්න ඕන.

මම මෙය සිදුකරන්නේ තනි තීරණ ගන්නා ලොක්කෙකු ලෙස නෙමෙයි. නව තරුණ, අවංක, යුක්ති ගරුක හා ධාර්මික අමාත්‍යවරුන් හා නිලධාරී කණ්ඩායමක් ද සමගයි කියන එක මම අවධාරණය කරනවා.

මම අපගේ මැති ඇමතිවරුන්ට සිය දේශපාලන බලය යොදා ව්‍යාපාර කිරීමට තිත තබනවා.

මම අපගේ මැති ඇමතිවරුන් සිය පවුලේ ඥාතීන්ගෙන් රාජ්‍ය ආයතන පිරවීමේ දුෂ්ට ක්‍රියාවලියට තිත තබනවා. මම වැදගත් උපායමාර්ග රාජ්‍ය ආයතන දේශපාලන හිතවතුන්ගේ පාලනයට නතු කිරීමේ ක්‍රියාවලියට තිත තබනවා.

මම දූෂිත නොවූ, සිය වත්කම්, බැරකම් විවෘතව ප්‍රකාශ කරනා, වෘත්තියවේදී තරුණ ඇමති මණ්ඩලයක්, නිපුණතාවයෙන් යුතු නිලධාරී මණ්ඩලයක් රටට හඳුන්වා දෙන බවටත්, සංවර්ධන හා සමාජ ඉලක්ක හඳුන්වා දී ඒවා ස්වාධිනව සොයා බැලීමට හැකි විශේෂ ආයතනයක් ජනාධිපති කාර්යාලයේ පිහිටුවන බවත් ඔබට පොරොන්දු වෙනවා.

මම දූෂිතයින්ට, හිංසකයින්ට, මත් ද්‍රව්‍ය ජාවාරම්කරුවන්ට, උමතු ආගමික අන්තවාදීන්ට කිසිඳු සමාවක් හෝ අනුකම්පාවකින් තොරව නීතිය ක්‍රි යාත්මක කරනවා.

මම මේ රටේ මන්ත්‍රීවරුන්ට වාහන බලපත්‍ර ලබාදීමේ හා ආරක්ෂාව ලබා දීමේ ප්‍රභූවාදී දේශපාලන සංස්කෘතිය සහ මුලින්ම නතර කරන බවට ඔබ සැම ඉදිරියේ ප්‍රතිඥාවක් දෙනවා.

ස්ත්‍රී දූෂකයන්ට, ඩීල්කාරයන්ට, ත්‍රස්තවාදීන්ගේ, අන්තවාදීන්ගේ, පාතාල ලෝකයේ උපාය සහායකයන්ට දේශපාලන රැකවරණ ලැබීම අවසන් කිරීමට මම අධිෂ්ඨාන කරගෙන ඉන්නවා.

මම මේ රටේ දූෂිත, සැඟවුණු දේශපාලන සංස්කෘතිය වෙනුවට, නැවුම්, තරුණ, පිරිසිදු, නිපුණතාවාදී දේශපාලන සංස්කෘතියකට ගමන් කිරීමට දැඩි හා ඍජු පියවර තබන්න සූදානම්.

එහිදී,

මා ජනාධිපතිධූරයට පත්වූ වහාම පාර්ලිමේන්තුවේ බහුතරය දිනාගත හැකි නව අගමැතිවරයෙක් පත්කරන බවට මම ඔබට ප්‍රකාශ කරන්න කැමතියි.

මාගේ ඇමැති මණ්ඩලයට දූෂණ හා අක්‍රමිකතා පිළිබඳ චෝදනා ලත් කිසිවෙක් ඇතුළත් කර ගන්නේ නැහැ. හැකිතාක් ඉක්මනින් සාධාරණ මැතිවරණයක් පවත්වලා ස්ථාවර නව ආණ්ඩුවක් පිහිටුවන්න මම ක්‍රියා කරනවා. ජාතික ලැයිස්තුව තුළ වෘත්තීයවේදීන්ට, කාන්තාවන්ට නිසි තැන දෙමින් අලූත් ආදර්ශයක් ලබා අපි ලබා දෙනවා.

නව තරුණ අපේක්ෂකයන්ට මහා මැතිවරණය හා ඉන් පසුව පවත්වන පළාත් සභා මැතිවරණයේදී අවස්ථාව ලබා දෙනවා. එහිදී ද කාන්තාවන්ට නිසි තැන අපි ලබා දෙනවා.

එමෙන්ම නව ව්‍යස්ථාවක් තැනීමේ කාර්ය පාර්ලිමේන්තුවට සීමා නොකර ජනතාව අතරට ගෙන ගොස්, ජනතා අඳහස් ලබාගෙන සියළුම ජන කණ්ඩායම් වලට තමා ශ්‍රී ලංකාවේ පුරවැසියෙක්ය යන හැඟීම ඇති වන නව ව්‍යස්ථාවකට අවශ්‍ය මහා සම්මුතිය පාර්ලිමේන්තුව තුළත්, ජනතාව තුළත් ගොඩ නගන්න මම අවංකවම කැපවෙනවා.

ජනතාවගේ ඍජු කැමැත්ත ඒ ව්‍යවස්ථාව සඳහා ලබාගෙන මිස එය ක්‍රි යාත්මක කරන්නේ නැහැ.

දශක ගණනාවක මාගේ දේශපාලන අත්දැකීමෙන් සහ ජනතාවගේ පසුගිය සති කිහිපය තුළ මට ලැබුණු ආශ්වාදනීය ප්‍රතිචාර හා අදහස්වලට සිය දහස්වාරයක් ගරුත්වය දක්වමින් නව සමාජ විප්ලවයකට එක්ව ඉදිරියට යෑමට එක්වන ලෙස මම ඔබට ගෞරවයෙන් ආරාධනා කර සිටිනවා.

....


අදහස්

8 + 0 =
Solve this simple math problem and enter the result. E.g. for 1+3, enter 4.
අදහස් දැක්වීම් 0