ජාතික මැතිවරණ කොමිෂන් සභාව ඇතුළු ස්වාධීන කොමිෂන් සභා සඳහා නව සාමාජිකයින් පත් කිරීම තවදුරටත් ප්‍රමාද වනු ඇතැයි තොරතුරු වාර්තා වනවා.
ස්වාධීන කොමිෂන් සභාවල සාමාජිකයන් වීමට සුදුසුකම් ලත් සාමාජිකයින්ගෙන් අයදුම්පත් භාර ගැනීම පෙබරවාරි 15 වැනිදායින් අවසන් වුණා.
ජාතික මැතිවරණ කොමිෂන් සභාව ඇතුළු ස්වාධීන කොමිෂන් සභා සඳහා සාමාජිකයින් පත් කිරීම වෙනුවෙන් පසුගිය මාසයේ දී යි ආණ්ඩුක්‍රම ව්‍යවස්ථා සභාව විසින් අයදුම්පත් කැඳවනු ලැබුවේ.
ආණ්ඩුක්‍රම ව්‍යවස්ථාවේ 41B වගන්තියේ උපලේඛනයේ දක්වා ඇති විධිවිධාන යටතේ මෙම පත්වීම් සිදු කරනු ලබනවා.
පුවත්පත්වල ද අදාළ දැන්වීම් පළකර තිබුණා.
අයදුම්පත් විශාල ප්‍රමාණයක් ඉදිරිපත් වීම, නුසුදුස්සන් විසින් අයදුම්පත් ඉදිරිපත් කිරීම සහ ඇතැම් අවස්ථාවල කොමිෂන් සභා එකකට වඩා සාමාජිකයන් වීමට ඇතැම් පුද්ගලයන් ඉල්ලුම් කර තිබීම හේතුවෙන් තේරීම් ක්‍රියාවලිය සංකීර්ණ වී ඇති බවයි පාර්ලිමේන්තු ආරංචි මාර්ග සඳහන් කරන්නේ.
ආණ්ඩුක්‍රම ව්‍යවස්ථාවේ 21 වැනි සංශෝධනය බලාත්මක කිරීමෙන් පසු සියලු ස්වාධීන කොමිෂන් සභා සඳහා සාමාජිකයින් පත් කිරීම වෙනුවෙන් අයදුම්පත් කැඳවීමට කථානායක මහින්ද යාපා අබේවර්ධන මහතාගේ ප්‍රධානත්වයෙන් ආණ්ඩුක්‍රම ව්‍යවස්ථා සභාව තීරණය කළා.
21 වැනි ආණ්ඩුක්‍රම ව්‍යවස්ථා සංශෝධනය බලාත්මක කිරීමෙන් පසු ආණ්ඩුක්‍රම ව්‍යවස්ථා සභාව ද යළි පිහිටු වීමට පියවර ගැනුණා.
ඒ අනුව කවුන්සිලය විසින් ස්වාධීන කොමිෂන් සභාවට නව සාමාජිකයින් පත් කළ යුතු අතර පත්කිරීම අවසන් වන තුරු දැනට සිටින සාමාජිකයින් අන්තර්වාර පදනම මත ක්‍රියා කරනු ඇති.