රුපියල් දහතුන් ලක්ෂ පනස් දහසක් වටිනා විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙන ආ ශ්රී ලාංකික ගුවන් මගියෙකු අද (06) දින අලුයම ගුවන් තොටුපොළ පොලිස් මත්ද්රව්ය කාර්යාංශයේ නිලධාරීන් පිරිසක් ද විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ කන්තලේ ප්රදේශයේ පදිංචි 48 හැවිරිදි පුද්ගලයෙක්.
ඔහු අද (06) දින අලුයම 05.20 ට ඩුබායි සිට ෆිට්ස් එයාර් ගුවන් සේවයේ 8 ඩී. – 822 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔහු විසින් රැගෙන ආ ගමන් මලු තුළ රෙදි සේදුම් කුඩු , චොකලට් සහ සුවඳ විළවුන් අඩංගු පෙට්ටි තුළ , මෙම විදේශීය නිෂ්පාදිත ” දුම්වැටි 9,000 ක් අඩංගු දුම්වැටි කාටූන් 45 ක් සිය භාරයට ගත් බවයි පොලිස් මත්ද්රව්ය කාර්යාංශයේ නිලධාරීන් සඳහන් කළේ.
මෙම ගුවන් මගියා සහ ඔහු විසින් නීතිවිරෝධී ලෙස රැගෙන ආ දුම්වැටි තොගය එළඹෙන (08) දින වැඩිදුර විමර්ශන කටයුතු සඳහා මීගමුව මහේස්ත්රාත් අධිකරණයට ඉදිරිපත් කිරීමට නියමිතයි.