ලොව අඩුම උපත් බර වාර්තා වූ සිංගප්පූරුවේ ක්වෙක් යූ ෂුයැං නමැති බිළිඳිය මාස 13ක් දැඩි සත්කාර ඒකකයේ ප්‍රතිකාර ගැනීමෙන් පසු මුදා හැරීමට එරට රෝහල් බලධාරිහු පියවර ගත්හ. ග්‍රෑම් 212ක බරකින් යුතුව හා සෙන්ටිමීටර් 24ක උස ප්‍රමාණයකින් යුතුව මෙලොව එළිය දුටු මේ දැරිය රෝහල් බලධාරීන් විසින් ඇගේ මාපියන්ට බාර දෙනු ලැබුවේ ජීවිත අවදානම මුළුමනින්ම තුරන්වීමෙන් පසුය.
දැඩි රෝගී තත්ත්වයෙන් පසුවීම හේතුවෙන් නියමිත කාලයට වඩා මාස 4ක් අඩු කාලයකදී සිසේරියන් සැත්කමක් මගින් බිහි කළ දැරිය මාස 13කට පසු රෝහලෙන් මුදා හරින විට ඇගේ බර කිලෝග්‍රෑම් 6.3ක් දක්වා වර්ධනය වී තිබිණි.
ජීවත්වීමට ඇති අවස්ථාව ඉතා සීමිත බවට සහතික කරමින් දැඩි සත්කාර ඒකකයේ සුරක්ෂිතව ප්‍රතිකාර ගනිමින් සිටි දැරිය මේ වන විට සාමාන්‍ය තත්ත්වයක පසුවන බව රෝහල් වෛද්‍යවරු තහවුරු කර ඇත.