එජාප මහ ලේකම් පාලිත රංගේ බණ්ඩාර
රනිල් වික්‍රමසිංහ මහතාගේ ප්‍රකාශය සම්බන්ධයෙන් අදහස් දැක්වීමට පෙර හමුදාපති ජෙනරාල් ශවේන්ද්‍ර සිල්වා මහතා එම ප්‍රකාශය අධ්‍යනය කළේ නම් වටිනා බව එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතා සඳහන් කළේය.
මේපිළිබඳව වැඩිදුරටත් අදහස් දැක්වූ ඒ මහතා මෙසේ ද කීය.
“කොරෝනා ව්‍යාප්තිය සම්බන්ධයෙන් එක්සත් ජාතික පක්ෂ නායක රනිල් වික්‍රමසිංහ මහතා සිදු කළ ප්‍රකාශයෙන් කොරෝනා මර්දනයට පත් කර ඇති ජනාධිපති කාර්ය සාධක බළකායේ වැඩ කටයුතු සෞඛ්‍ය ක්ෂේත්‍රයේ විශේෂඥයන්ගේ මූලිකත්වයෙන් සිදු කළ යුතු බව අදහස් කළ විනා හමුදාව සිදු කරන කාර්ය අඩු තක්සේරුවට ලක් කිරීමක් සිදු කළේ නෑ.
පසුගිය 08 වැනිදා සිදු කළ ප්‍රකාශයෙනුත් ඊට පෙර පාර්ලිමේන්තුවේදී සහ ඉන් පිටතදීත් වික්‍රමසිංහ මහතා සිදු කළ ප්‍රකාශවලින් කොරෝනා මර්දනයට කළ යුතු දේ සම්බන්ධයෙන් අදහස් ප්‍රකාශ කළා. හමුදාව විසින් සිදු කරන එන්නත්කරණ ක්‍රියාවලිය විවේචනය කිරීම හෝ එයට අප්‍රසාදය පළ කිරීම හෝ හමුදාපති ශවේන්ද්‍ර සිල්වා මහතා විවේචනය කිරීමේ අදහසින් හෝ වික්‍රමසිංහ මහතා එම ප්‍රකාශ සිදු කළේ නෑ.”
ශිරෝමි අබයසිංහ