පා.ම. රිෂාඩ් බදියුදීන්
තමන්ට දේශපාලන වශයෙන් කුමන රජයකින් වූවත් මර්දනයක් හා තර්ජනයක් එල්ල වූවත් උතුරේ මුස්ලිම් ජනතාවගේ අයිතිවාසිකම් වෙනුවෙන් තම ජීවිතය පරදුවට තබා කටයුතු කරන බව සමස්ත ලංකා මුස්ලිම් මහජන කොංග්‍රසයේ වන්නි දිස්ත්‍රික් පාර්ලිමේන්තු මන්ත්‍රී රිෂාඩ් බදියුදීන් මහතා 30 දා පැවසීය.
ඔහු මේ බව පැවසුවේ මුලතිව් ප්‍රදේශයට පැමිණ මුලතිව් පළාතේ යළි පදිංචි කොට සිටින මුස්ලිම් ජනතාව හමු වීමෙන් අනතුරුවය.
තමන්ගේ දේශපාලන ජීවිතය අවසන් කිරීමට බොහෝ පිරිසක් ආකාර කීපයකට කටයුතු කරන බව මෙහිදී පැවසූ රිෂාඩ් බදියුදීන් මන්ත්‍රීවරයා මේ වන විට තමන්ගේ ජීවිතය පවා විශාල අනතුරකට පත්ව ඇති බවද ප්‍රකාශ කළේය.
ඒ කෙසේ වෙතත් උතුරේ සිංහල දෙමළ හා මුස්ලිම් ජනතාව තමන් පිළිබඳව ඉතා මැනවින් කරුණු දන්නා නිසා ඒ ජනතාවගේ ප්‍රසාදය හා සහයෝගය ලැබීම ගැන තමන් ඉතා සතුටට පත්වන බවද කියා සිටියේය.
උතුරු පළාත් විශේෂ – රසුල දිල්හාර ගමගේ