වගකීම් සියල්ල ආණ්ඩුව පිට පවරා ඊළග මැතිවරණයෙන් බලය ලබා ගැනීමට උත්සාහ දරන සාම්ප්‍රදායික දේශපාලන ක්‍රමයෙන් බැහැරව රට වෙනුවෙන් වූ සදාචාරාත්මක වගකීම ඉටු කිරීමට සියලු දේශපාලනඥයන් සහ දේශපාලන පක්ෂ එක්විය යුතු බව ජනාධිපති රනිල් වික්‍රමසිංහ මහතා අවධාරණය කළේය.
උද්ධමනය වැඩිවීමත් සමඟ සිදු වූ භාණ්ඩ මිල ඉහළ යාම නිසා අද ජනතාව පත්ව සිටින අසීරුතාව තමා අමතක කර නොමැති අතර, පියවරින් පියවර රටේ ආර්ථික ගැටලු විසඳා ගනිමින් ලබන වසරේ සිට ජනතාවට සහන ලබාදීමට කටයුතු කරන බව ද ජනාධිපතිවරයා පැවසීය.
ජනාධිපති රනිල් වික්‍රමසිංහ මහතා මේ බව සඳහන් කළේ අද (22) පෙරවරුවේ නුවරඑළිය නගර ශාලාවේ පැවති ආහාර සුරක්ෂිතතා දිස්ත්‍රික් වැඩසටහනේ ප්‍රගති සමාලෝචන රැස්වීමට එක්වෙමිනි.