වාලච්චේන ප්‍රදේශයේ සිරුරට ගිනි තබාගෙන සිටි බව කියන පුද්ගලයෙකු මුදා ගැනීමට ගිය පොලිස් නිලධාරීන් දෙදෙනෙකු අකරතැබ්බයකට මුහුණ පා තිබේ.
පිළිස්සුම් තුවාල ලැබූ පොලිස් නිලධාරීන් දෙදෙනාද රෝහල්ගත කර ඇති බවයි අප වාර්තාකරු පැවසුවේ.
වාලච්චේන – මාන්චෝලේ, පාසල පාරේ පිහිටි නිවසක සිරුරට ගිනි තබාගෙන සිටි බව කියන පුද්ගලයෙකු මුදා ගැනීමට ගිය පොලිස් නිලධාරීන් දෙදෙනා වෙත, ගිනි තබා ගත් පුද්ගලයා කඩාපැන බදාගැනීම හේතුවෙනුයි මෙම අනතුර සිදුව ඇත්තේ.
පොලීසිය වැඩිදුරටත් සඳහන් කළේ පිළිස්සුම් තුවාල ලැබූ වාලච්චේන පොලිසියේ උප පොලිස් පරීක්ෂකවරයා සහ පොලිස් කොස්තාපල්වරයෙකු මෙන්ම සිරුරට ගිනි තබා ගැනීම නිසා පිළිස්සුම් තුවාල ලැබූ 38 හැවිරිදි පුද්ගලයා වාලච්චේන සහ මඩකලපුව රෝහල්වලට ඇතුළත් කර ඇති බවයි.
විමර්ශනවලදී අනාවරණය වී ඇත්තේ මැදපෙරදිග රටක රැකියාවක නිරතව සිටින බිරිඳට මුදල් එවන ලෙස ඉල්ලා බලකිරීම නිසා දෙදෙනා අතර හට ගත්තේ යැයි කියන ආරවුලක් දුරදිග යෑමෙන් පසු මෙම 38 හැවිරිදි පුද්ගලයා ඔහුගේ සිරුරට ගිනි තබාගෙන ඇති බවයි.