ප්‍රධාන දේශපාලන පක්ෂයක කළුතර කාර්යාලය පවත්වාගෙන ගිය නිවසේ භූගත බංකරයක් සකස් කර නීති විරෝධී මත්පැන් පෙරීමේ ජාවාරමක් පවත්වාගෙන ගිය එම පක්ෂයේ කළුතර ප්‍රාදේශීය සභා අපේක්ෂකයෙකු පොලිස් අත්අඩංගුවට ගෙන තිබෙනවා.
මහ වස්කඩුව ප්‍රදේශයේ පදිංචි 42 හැවිරිදි අයෙකු මෙලෙස අත්අඩංගුවට ගෙන ඇති අතර ඔහු අදාළ පක්ෂයෙන්ම කොට්ඨාස අපේක්ෂක ලෙසින් නාමයෝජනා භාරදී ඇති බවයි පොලිසිය අනාවරණ කරගෙන ඇත්තේ.
කළුතර ප්‍රධාන පාසලක් ආසන්නයේ ගාලුපාරට මුහුණලා පිහිටි නිවස රුපියල් 30,000ක මාසික කුලියට ලබාගෙන ත්‍රීරෝද රථ, යතුරුපැදි අළුත්වැඩියා කිරීම සහ පින්තාරු කිරීම ඇතුළු සේවාවන් සිදුකරන මුවාවෙන් ජාවාරම කරගෙන ගොස් ඇති බව ද පොලිසිය සඳහන් කළා.
පොලිසියට ඇතිවූ සැකයක් මත එය පරීක්ෂා කිරීමට පැමිණීමේදී ඉබි යතුරු දමා තිබූ කාමරයක දොරවල් කඩා පරීක්ෂා කර තිබෙනවා. එහි තිබී ගෝඩා මිලිලීටර් ලක්ෂ විස්සකට ආසන්න ප්‍රමාණයක් අඩංගු බැරල් 10ක්, ප්ලාස්ටික් කෑන් 05ක්, තඹ දඟර, ගෑස් ටැංකි ඇතුළු පෙරීමේ උපකරණ ද පොලිස් භාරයට ගෙන තිබෙනවා.
පිටතට ගඳ නොඑන ආකාරයට කාමරයේ සිමෙන්ති පොළොව කඩා ඇතුල් කළ බටයකින් නිවසින් පිටත පිහිටි වැසිකිලි වලකට අපද්‍රව්‍ය යොමු කර ඇති බව ද නිරීක්ෂණය වී ඇතැයි සඳහන්.
මෙම ස්ථානයේ නිෂ්පාදනය කරන මත්පැන් කළුතර, පොතුපිටිය, ගල්පාත සහ වාද්දුව ප්‍රදේශවලට තොග වශයෙන් බෙදා හැර ඇති බවට ද තොරතුරු අනාවරණය වී තිබෙනවා.
සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.