අභියෝග මධ්‍යයේ වුවද සෙසු රටවල් හා සසඳන කළ ශ්‍රී ලංකාව ණය බේරුම් කිරීමේ ක්‍රියාවලියේ දී වේගවත් ප්‍රගතියක් ලබා සිටින බව මුදල් රාජ්‍ය අමාත්‍ය ශෙහාන් සේමසිංහ පවසනවා.
අමාත්‍යවරයා පෙන්වා දෙන්නේ ශ්‍රී ලංකාව තවදුරටරත් තිරසර සංවර්ධන අරමුණු වෙනුවෙන් කැපවන බවයි. එක්සත් ජාතීන්ගේ සාර්ව ආර්ථික ප්‍රතිපත්ති, දිළිඳුකම පිටුදැකීම සහ සංවර්ධනය උදෙසා මුදල් යෙදවීම පිළිබඳ කමිටුවේ හතර වැනි සැසිවාරයට එක් වෙමින් අමාත්‍යවරයා මේ බව සඳහන් කළා.
මැදි ආදායම් ලබන රටක් බවට පත් වීමෙන් අනතුරුව ශ්‍රී ලංකාවට සහනදායි ණය ලබාගැනීමේ ගැටලුවකට මුහුණදීමට සිදු වූ බවයි ඔහු එහිදී සඳහන් කළේ.
පසුගිය සමයේ ඇති වූ ණය අර්බුදයත් සමඟ එම තත්ත්වය තව දුරටත් උග්‍ර වූ බව ද මුදල් රාජ්‍ය අමාත්‍යවරයා පෙන්වා දුන්නා.
දැනට ක්‍රියාත්මක ණය ප්‍රතිව්‍යුහගතකරණ ක්‍රියාවලිය අවසන් වීමෙන් අනතුරුව සහනදායී මූල්‍යකරණය යටතේ ආයෝජන අවස්ථා සඳහා වැඩි ඉඩකඩක් ලබාදීම වැදගත් බව ද ඔහු පැවසුවා.
ණය පීඩනයෙන් ස්ථිර ලෙස මිදීමට ණය නොවන ප්‍රතිපාදන ලැබීමේ මාර්ග පුළුල් කිරීම අත්‍යාවශ්‍ය බව පෙන්වා දුන් අමාත්‍යවරයා කියා සිටියේ ශ්‍රී ලංකාව ලෝකය සමඟ ආර්ථක සම්බන්ධතා පුළුල් කරමින් විශාලතම ආර්ථික ප්‍රදේශයවන නැගෙනහිර ලෝකය සමඟ ආර්ථික හවුල්කාරීත්වයකට සූදානම් වන බවයි.
අර්බුදකාරී තත්ත්වයෙන් පසු ශ්‍රී ලංකාව සංවර්ධනය සඳහා පෞද්ගලික අංශයේ වැඩි දායකත්වයක් ලබාගැනීමට අපේක්ෂා කරන අතර පෞද්ගලික අංශය සඳහා වැඩි ආයෝජන අවස්ථා විවෘත වන විට බහු පාර්ශ්වීය සංවර්ධන බැංකු, හවුල්කරුවන් ඊට සහය දැක් විය යුතු බවද ඔහු සඳහන් කර සිටියා.
එමඟින් ආයෝජකයන්ගේ අවදානම අවම කිරීමට හැකි වනු ඇතැයි අමාත්‍යවරයා පෙන්වා දුන්නා.
සිය යෝජනාව වන්නේ තනි තනිව රටවල් සංවර්ධනය කිරීම සඳහා තරග කිරීම වෙනුවට සෑම කෙනෙකුගේම ජීවන තත්ත්වය නංවාලීම සඳහා කලාපීය සංවර්ධනය ඇති කිරීම බව අමාත්‍යවරයා මෙහිදී වැඩිදුරටත් සඳහන් කළා.
එක්සත් ජාතීන්ගේ සාර්ව ආර්ථික ප්‍රතිපත්ති, දිළිඳුකම පිටුදැකීම සහ සංවර්ධනය උදෙසා මුදල් යෙදවීම පිළිබඳ සමුළුව තායිලන්තයේ බැංකොක් නුවර දී ඊයේ (01) ආරම්භ වූ අතර එය හෙට (03) දිනය දක්වා පැවැත්වෙනවා.