දෙණියායේ සිට කොළඹ බලා ධාවනය වූ පෞද්ගලික බස් රථයක් අද අළුයම වාද්දුව – පොතුපිටිය ප්‍රදේශයේදී මාර්ගයෙන් ඉවතට පැන අනතුරකට ලක් ව තිබෙනවා.
බස් රථය රිය අනතුරට ලක් වන අවස්ථාවේ දී එය අසල තිබූ විදුලි කණුවක් සහ දූරකථන කණුවක් කඩාගෙන අසල නිවාස දෙකක තාප්පයකට සහ ගේට්ටුවකට මුළුමනින් ම හානි සිදු කරගෙන ගොස් නැවතී ඇති බවයි අප ප්‍රාදේශීය වාර්තාකරු පැවසුවේ.
අනතුර සිදුවන විට පාපුවරුවේ ගමන්ගත් කොන්දොස්තරවරයා බරපතළ තුවාල ලබා පානදුර මූලික රෝහලට ඇතුළත් කර තිබෙනවා. අලුයම 3.40 ට පමණ මෙම අනතුර සිදුව ඇති අතර මගීන් සුළු පිරිසක් පමණක් ඒ මොහොතේ බසයේ සිට ඇති බවයි වාර්තා වන්නේ.
බසයට ද බරපතළ හානි සිදුව ඇති අතර පොලිසිය සැක පළ කරන්නේ අධික වේගය අනතුරට හේතු වන්නට ඇති බවයි.
