පාසල් සිසුන් පිරිසක් සිය දිවා ආහාරය පොලීතින්වල ඔතාගෙන පැමිණි බවට චෝදනා කරමින් ඔවුන්ට එම පොලීතින් කන ලෙස බල කළ බව කියන රඹුක්පිටිය මධ්‍ය මහා විද්‍යාලයේ විදුහල්පතිවරයාට වහාම ක්‍රියාත්මක වන පරිදි ස්ථාන මාරුවක් ලබා දී තිබේ.
අධ්‍යාපන අමාත්‍යවරයා අද (23) පාර්ලිමේන්තුවේදී විශේෂ ප්‍රකාශයක් සිදුකරමිනුයි මේ බව පැවසුවේ.
ඊයේ දිනයේදී නාවලපිටිය, රඹුක්පිටිය මධ්‍ය මහා විද්‍යාලයේ පාසල් සිසුන් දිවා ආහාරය පොලීතින්වල ඔතාගෙන පැමිණි බවට චෝදනා කරමින් එම පොලිතින් හා පත්තර කොළ කන ලෙස විදුහල්පතිවරයා සිසුන්ට බල කර තිබෙනවා.
මේ සම්බන්ධයෙන් අධ්‍යාපන අමාත්‍යවරයා විසින් මධ්‍යම පළාත් අධ්‍යාපන අධ්‍යක්ෂවරයා අමතා තොරතුරු ලබාගෙන ඇති අතර එහිදී අනාවරණය වී ඇත්තේ අදාළ පාසලේ 11 වන ශ්‍රේණියේ සිසුන් පිරිසක් දිවා ආහාරය ලන්ච් ෂීට්වල ඔතාගෙන රැගෙන විත් ඇති බවයි.
පාසල පොලිතීන්වලින් තොර කලාපයක් ලෙස පවත්වාගෙන යන බැවින් අදාළ සිසුන්ට එම ලන්ච් ෂීට් හා පත්තර කඩදාසි කන ලෙස විදුහල්පතිවරයා බලකර තිබේ.
මෙම සිදුවීමට මුහුණදුන් පාසල් සිසුන් දෙදෙනෙක් ඊයේ උදෑසන නාවලපිටිය රෝහලට ඇතුළත් කර ඇති අතර සිදුවීමට මුහුණදුන් අනෙක් සිසුන් පස්දෙනා අද (23) පාසල් පැමිණ තිබෙනවා.
මේ සම්බන්ධයෙන් ඊයේ නාවලපිටිය පොලීසියටද පැමිණිල්ලක් ලැබී ඇති අතර ඒ අනුව පස්බාගේ කොට්ඨාස අධ්‍යාපන අධ්‍යක්ෂවරයා විසින් ස්ථානීය පරීක්ෂණයක් පවත්වා තිබෙනවා.
එම පරීක්ෂණ කටයුතුවල පහසුව වෙනුවෙන් මෙලෙස අදාළ විදුහල්පතිව ස්ථාන මාරු කර ඇති බවයි පොලීසිය පවසන්නේ.