අධිවේගී මාර්ගයේ කොට්ටාව – අතුරුගිරිය අතර කිලෝමීටර් 03 කණුව අසළදී ලොරි රථයක පිටුපසින් පැමිණි තවත් ලොරි රථයක් ගැටීමෙන් අනතුරක් සිදුව තිබෙනවා.
පොලීසිය පැවසුවේ අද (28) අලුයම් කාලයේ මෙම අනතුර සිදුව ඇති බවයි.
පිටුපසින් පැමිණි ලොරි රථයේ ගමන් ගත් රියදුරු සහ කාන්තාවක් තුවාල ලබා හෝමාගම මූලික රෝහලට ඇතුළත් කිරීමට යාමේදී කාන්තාව මියගොස් තිබෙනවා.
මෙලෙස මියගොස් ඇත්තේ ඇඹිලිපිටිය, සෙවනගල, කොවුල්ආර ප්‍රදේශයේ පදිංචි 39 හැවිරිදි කාන්තාවක්. ඇඹිලිපිටිය බලා යෑමට කඩුවෙල අධිවේගී පිවිසුම අසළදී ඇය මෙම ලොරි රථයට ගොඩ වී ඇති බවයි අනාවරණය වී ඇත්තේ.
එම ලොරි රථය කඩුවෙල දෙස සිටකොට්ටාව දෙසට ගමන් කිරීමේ දී අතුරුගිරිය කිලෝමීටර් 03 කණුව ආසන්නයේ කාර්මික දෝෂයකට ලක්ව නවතා තිබූ තවත් ලොරි රථයක පිටුපස ගැටී මෙම අනතුර සිදුව තිබෙනවා.
අනතුරට පත් ලොරි රථය පොහොර තොගයක් පටවාගෙන කොළඹ සිට ඇඹිලිපිටියට යමින් තිබූ කන්ටේනර් රථයක් බවයි අතුරුගිරිය අධිවේගී පොලිස් මුරපොළ සඳහන් කළේ.
