මධුවිත පානය කර මත් වී වතුර කියා කළුතෙල් පානය කළ පුද්ගලයකු ප්‍රතිකාර සඳහා රත්නපුර මහ රෝහලට ඇතුළත් කර තිබෙනවා.
මෙම පුද්ගලයා මංගල්‍ය උත්සවයකට සහභාගී වී අධික ලෙස මත්පැන් පානය කර ඇති බවත් පසුව නටමින් සහ ගී කියමින් විනෝද වී ඇති බවත් අනාවරණය වී තිබෙනවා.
කෙසේවෙතත් මොහු මංගල්‍ය උත්සවයට සමු දී තවත් පිරිසකගේ සහායෙන් ඇල්පිටිය ප්‍රදේශයට පැමිණ, මිතුරන් කිහිපදෙනෙකු සමඟ මත්පැන් පානය කර අසිහියෙන් නිවස බලා ගොස් ඇති බවයි පොලීසිය පවසන්නේ.
එලෙස නිවසට ඇතුළු වූ මෙම පුද්ගලයා වතුර යැයි සිතා මුළුතැන්ගෙයි පසෙක තබා තිබූ කළුතෙල් බඳුන ගෙන පානය කර තිබෙනවා. ඉන්පසු මොහු රෝගාතුර වීම හේතුවෙන් ඥාතීන් විසින් මොහු කහවත්ත මූලික රෝහලට ඇතුළත් කර තිබෙනවා.
ඒ අනුව රෝගියාව වැඩිදුර ප්‍රතිකාර සඳහා රත්නපුර මහ රෝහල වෙත මාරුකර යවා ඇති බවයි වාර්තා වන්නේ.