සීගිරියේ සිට ඉර සේවය නැරඹීමට විදෙස් සංචාරකයින්ට අවස්ථාව ලබාදීමෙන් දිනකට ඇමෙරිකානු ඩොලර් තුන්දහසකට අධික ආදායමක් ලැබෙන බව මධ්‍යම සංස්කෘතික අරමුදලේ අධ්‍යක්ෂ ජනරාල් මහාචාර්ය ගාමිණී රණසිංහ පැවසීය.
ආගමික කටයුතු සහ සහජීවනය පිළිබඳ ආංශික අධීක්ෂණ කාරක සභාව පාර්ලිමේන්තුවේදී රැස් වූ අවස්ථාවේදීයි ඔහු මේ බව අනාවරණය කළේ.
වසර දෙකකට පෙර ණය බරින් පෙළුණු මධ්‍යම සංස්කෘතික අරමුදලේ ආදායම අද වන විට සියයට 614කින් වර්ධනය කර ගැනීමට හැකි වී ඇති බවයි ඔහු කියා සිටියේ.
එමෙන්ම සීගිරිය ආශ්‍රිතව සංචාරක ආකර්ෂණය ලබාගත හැකි අංශ තවදුරටත් හඳුනාගනිමින් පවතින අතර ඒ සඳහා කොයිකා ආයතනය ඇමරිකානු ඩොලර් මිලියන 8ක ආධාරයක් ලබාදීමට එකඟතාව පළ කර ඇති බවයි අධ්‍යක්ෂකවරයා වැඩිදුරටත් සඳහන් කළේ.