ඇතැම් සහල් මෝල් හිමියන් කෘත්‍රිමව ඇති කිරීමට උත්සාහ කරන සහල් හිඟය මෙවර උත්සව සමයේ සහල් මිල ඉහළ දැමීමේ උපක්‍රමයක් බව කෘෂිකර්ම අමාත්‍ය මහින්ද අමරවීර පැවසීය.
අවශ්‍ය තරම් සහල් තොග රට තුළ පවතින බවයි අමාත්‍යවරයා සඳහන් කළේ.
පාරිභෝගික ආරක්ෂණ පනත යටතේ අධික මිලට අලෙවි කරන පුද්ගලයින් සහ සමාගම් සම්බන්ධයෙන් පමණක් විමර්ශනය කර නඩු පැවරීමට පාරිභෝගික කටයුතු අධිකාරියේ බලධාරීන්ට බලය තිබෙනවා.
සහල් හෝ වෙනත් ආහාර ද්‍රව්‍ය සඟවන පුද්ගලයින්ට නඩු පැවරීමට හෝ එවැනි ස්ථාන පරීක්ෂා කිරීමට ඔවුන්ට බලයක් නොතිබූ බැවින් සහල් තොගකරුවන්ට එරෙහිව නඩු පැවරීම සඳහා පාරිභෝගික ආරක්ෂණ පනත සංශෝධනය කිරීම සම්බන්ධයෙන් කැබිනට් මණ්ඩල රැස්වීමේදී සාකච්ඡාවක් පැවතියා.
අමාත්‍යවරයා කියා සිටියේ මෙම පනතට අවශ්‍ය සංශෝධන ලබන මාසයේ කැබිනට් මණ්ඩලයට ඉදිරිපත් කරන බවයි.