දුරකථනයක් මිලදී ගන්නේ නම් විදුලි සංදේශ නියාමන කොමිෂන් සභාව මගින් අනුමත කළ දුරකථනයක් පමණක්ම මිලදී ගැනීමට පාරිභෝගිකයන් කටයුතු කළ යුතු බව ශ්‍රී ලංකා විදුලි සංදේශ නියාමන කොමිෂන් සභාවේ නියෝජ්‍ය අධ්‍යක්ෂ මේනකා පතිරණ පවසනවා.
රජයේ ප්‍රවෘත්ති දෙපාර්තමේන්තුවේදී මාධ්‍ය වෙත අදහස් දක්වමින් නියෝජ්‍ය අධ්‍යක්ෂවරිය සඳහන් කළේ ඕනෑම දුරකථනයක ඉමි අංකය (IMEI number) එහි ඇසුරුමේ සටහන් කර ඇති බවයි.
එම අංකය පාරිභෝගිකයන් සතු වෙනත් ඕනෑම දුරකථනයකින් IMEI ලෙස ටයිප් කර ඉඩක් තබා අංක 15කින් යුත් අංකය ටයිප් කර කෙටි පණිවුඩයක් ආකාරයෙන් 1909ට යොමු කළ යුතු වනවා.
එම මොහොතේදීම අදාළ දුරකථනය විදුලි සංදේශ නියාමන කොමිෂන් සභාව විසින් අනුමත කළ දුරකථනයක් ද යන වග ඇතුලත් පිළිතුරු පණිවුඩයක් ලැබෙන බවයි මේනකා පතිරණ පෙන්වා දුන්නේ.
දුරකථන පාරිභෝගිකයෙකු ලෙසට අනාගතයේ පත්විය හැකි අපහසුතා වළක්වා ගැනීමට මෙය ඉතා වැදගත් කරුණක් වන බව ද නියෝජ්‍ය අධ්‍යක්ෂවරිය ප්‍රකාශ කළා.