තමා ජනාධිපතිවරණයට ඉදිරිපත් නොවන බවත් ශ්‍රී ලංකා පොදුජන පෙරමුණේ ජනාධිපතිවරණ අපේක්ෂකයා නියමිත වේලාවට ඉදිරිපත් කිරීමට සූදානම් බවත් ශ්‍රී ලංකා පොදුජන පෙරමුණේ නායක හිටපු ජනාධිපති මහින්ද රාජපක්ෂ පැවසීය.
ශ්‍රී ලංකා පොදුජන පෙරමුණේ පක්ෂ මූලස්ථානයේදී ඊයේ (04) පැවති විශේෂ රැස්වීමකින් අනතුරුව මාධ්‍ය වෙත අදහස් දක්වමින් හෙතෙම මේ බව සඳහන් කළේය.
එම ධූරයට තරග කිරීමට තමා ඉදිරිපත් නොවන බව ද ඊට ඉදිරිපත් කිරීමට තම පක්ෂයේ අපේක්ෂකයන් කිහිප දෙනෙකු ම සිටින බවත් හිටපු ජනාධිපතිවරයා එහිදී අවධාරණය කළේය.
එහිදී වැඩිදුරටත් අදහස් දැක්වූ හිටපු ජනාධිපතිවරයා කියා සිටියේ ඉදිරි සියලුම මැතිවරණ සඳහා තම පක්ෂය සූදානම් බවත් පාර්ලිමේන්තුව විසිරුවා පාර්ලිමේන්තු මැතිවරණයකට යනවා නම් තම පක්ෂය ඊටද සූදානම් බවත්ය.