බදුලු ඔයට ඇද වැටීමෙන් කාන්තාවක් අද (08) ජීවිතක්ෂයට පත්ව තිබෙනවා.
පොලිසිය පැවසුවේ මෙලෙස ජීවිතක්ෂයට පත්ව ඇත්තේ යුනිට් 4 /බී /66, බදුලුඔය, කන්දකැටිය ලිපිනයේ පදිංචි 72 හැවිරිදි බී.එම්. සෝමාවතී නැමැති තිදරු මවක් බවයි.
ඇයගේ පවුලේ අය විසින් කන්දකැටිය, පුවක්කොටුව යාය ප්‍රදේශයේ වගා කර ඇති බඩඉරිඟු වගාවක අස්වැන්න නෙලීම අද සිදු කර තිබෙනවා.
ඔවුන් සඳහා දහවල් ආහාරය රැගෙන බදුලු ඔය හරහා ගමන් කිරීමට දමා තිබූ ඒදණ්ඩකින් ගමන් කරමින් සිටියදීයි ඇය මෙලෙස ඔයට ඇද වැටී ඇත්තේ.
ඔයට වැටුණු කාන්තාව දිය පහරට හසුව ගසාගෙන ගොස් ඇති අතර පොලිසිය හා ගම්වාසීන් ඇය සොයා සිදුකළ පරික්ෂාවකදී ඔයේ සිට කිලෝ මීටර් එකහමාරක් පමණ දුරක තිබීඉ මෙම කාන්තාවගේ සිරුර හමුව තිබෙනවා.
පොලීසිය පැවසුවේ ඇය ඒ වනවිටත් මියගොස් සිටි බවයි.
