සිය පක්ෂ සාමාජිකත්වය අහිමි කිරීමට සමගි ජන බලවේගය ගෙන තිබෙන තීරණය නීති විරෝධී යැයි ප්‍රකාශ කරන ලෙස ඉල්ලා රාජ්‍ය ඇමතිනී ඩයනා ගමගේ විසින් ගොනු කර තිබෙන පෙත්සම ලබන 28 වැනිදා වැඩිදුර විභාගය සඳහා කැඳවන ලෙස ශ්‍රේෂ්ඨාධිකරණය අද (09) නියම කළා.
මෙම පෙත්සම අද එස්. තුරෙයි රාජා සහ කුමුදුනී වික්‍රමසිංහ යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබුවා.
එහිදී ත්‍රිපුද්ගල විනිසුරු මඩුල්ල නිසියාකාරව සම්පූර්ණ වී නොමැති හෙයින් වැඩිදුර විභාගය සඳහා පෙත්සම ලබන 28 වැනිදා කැඳවන ලෙසයි විනිසුරු මඩුල්ල නියම කරනු ලැබුවේ.
පෙත්සම්කාර රාජ්‍ය ඇමතිනී ඩයනා ගමගේ කියා සිටින්නේ ආණ්ඩුක්‍රම ව්‍යවස්ථාවේ 20 වන සංශෝධනයට පක්ෂව ඡන්දය ප්‍රකාශ කිරීමෙන් පසුව සිය පක්ෂ සාමාජිකත්වය අහිමි කිරීමට සමගි ජන බලවේගය කටයුතු කර ඇති බවයි.
කිසිදු සාධාරණ විනය පරීක්‍ෂණයක් නොපවත්වා සිය පක්ෂ සාමාජිකත්වය අහිමි කිරීම නීතියට පටහැනි යැයි තීන්දු කොට එම තීරණය බල රහිත කිරීමේ නියෝගයක් නිකුත් කරන ලෙස ඉල්ලා ඩයනා ගමගේ මෙම පෙත්සම ඉදිරිපත් කර තිබෙනවා.