මේ දිනවල පැවැත්වෙන සාමාන්‍ය පෙළ විභාගයේ සිදු වූ අක්‍රමිකතාවක් ගැන විභාග දෙපාර්තමේන්තුව විසින් පරීක්ෂණයක් ආරම්භ කර තිබෙනවා.
ඊයේ (09) පැවති අපොස සාමාන්‍ය පෙළ විභාගයේ ඉංග්‍රීසි භාෂා ප්‍රශ්න පත්‍රය වට්ස්ඇප් හරහා සංසරණය වී තිබුණා.
විභාග කොමසාරිස් ජනරාල් අමිත් ජයසුන්දර පැවසුවේ විභාග අපේක්ෂකයින් විසින් ජංගම දුරකථන සූක්ෂම ලෙස භාවිත කරමින් ඉංග්‍රීසි ප්‍රශ්න පත්‍රය ජායාරූප ගත කර වෙනත් පාර්ශ්ව වෙත එය යොමුකර පිළිතුරු ලබා ගැනීමට උත්සාහ කර තිබෙන බවයි.
කෙසේනමුත් එම අවස්ථාවේ විභාග මධ්‍යස්ථානවල සිටි නිලධාරීන් විසින් සිසුන්ගේ එම ජංගම දුරකථන සිය භාරයට ගෙන තිබුණා.
විභාග දෙපාර්තමේන්තුව වැඩිදුරටත් සඳහන් කළේ මෙය ඉංග්‍රීසි භාෂා ප්‍රශ්න පත්‍රයේ රහස්‍යභාවයට බලපෑමක් නොවන බවයි.