අධිකරණයට අපහාස කළේ යැයි චෝදනා කරමින් ගොනුකර තිබූ පෙත්සමක වගඋත්තරකරුවකු ලෙස නම් කර සිටින හිටපු සුරාබදු කොමසාරිස් ජෙනරාල් එම්.ජේ. ගුණසිරි මහතා, පෞද්ගලික කටයුත්තක් සඳහා විදේශගත වීමට අවසර ලබා දෙන ලෙස කළ ඉල්ලීමකට ශ්‍රේෂ්ඨාධිකරණය අවසර ලබා දුන්නේය.
අධිකරණ නියෝග උල්ලංඝනය කරමින් මත්පැන් බලපත්‍ර නිකුත් කිරීමේ සිදුවීම් සම්බන්ධයෙන් අධිකරණයට අපහාස කළේ යැයි චෝදනා කරමින් ගොනුකර තිබූ පෙත්සමට අදාළව, හිටපු සුරාබදු කොමසාරිස් ජෙනරාල්වරයා මීට පෙර අධිකරණ අවසරයකින් තොරව විදේශගත නොවන බවට ප්‍රතිඥාවක් ලබා දී තිබුණි.
ඒ සඳහා ඉදිරිපත් කළ මෝසමක් හරහා, ජනාධිපති නීතිඥ රොමේෂ් ද සිල්වා මහතා ඔස්ට්‍රේලියාවේ පෞද්ගලික කටයුත්තක් සඳහා 2024 ජනවාරි 22 සිට පෙබරවාරි 28 දක්වා කාලසීමාව තුළ සේවාදායකයාට විදේශගත වීමට අවසර දෙන ලෙස අධිකරණයෙන් ඉල්ලා සිටියේය.
එම ඉල්ලීමට පෙත්සම ඉදිරිපත් කළ බලපත්‍ර ලත් මත්පැන් හල් හිමියන් විරෝධය පළ නොකළහ.
ඒ අනුව, හිටපු සුරාබදු කොමසාරිස් ජෙනරාල්වරයාගේ ඉල්ලීමට අවසර දෙන බව විනිසුරු මඩුල්ල නියෝග කළේය.