පාර්ලිමේන්තු මන්ත්‍රී අර්ජුනා රාමනාදන්ගේ මන්ත්‍රී ධුරය අවලංගු කරන ලෙස – අභියාචනාධිකරණයේ විරෝධතා ඉදිරිපත් කිරීමට කල් දෙයි
අභිනව නිවහල් පෙරමුණේ සභාපති ඔෂල හේරත් විසින් ගොනු කර ඇති පෙත්සමක් අද දින අභියාචනාධිකරණය හමුවේ විභාගයට ගැනුණි. මායාදුන්නේ කොරයා සහ ඒම්. ගොපල්ලව යන විනිසුරුවරුන්ගෙන් සමන්විත විනිසුරු මඩුල්ල ඉදිරියේ මෙම නඩුව කැඳවන ලදී.
සෞඛ්‍ය අමාත්‍යාංශයේ ලේකම් වෙනුවෙන් පෙනී සිටි අතිරේක සොලිසිටර් ජනරාල් සුමති ධර්මවර්ධන මහතා අධිකරණයට පැවසුවේ පෙත්සම්කරු වන පාර්ලිමේන්තු මන්ත්‍රීවරයා දැනට වැඩ තහනමට ලක්ව සිටින වෛද්‍ය නිලධාරියෙකු බවයි.
මන්ත්‍රී රාමනාදන් අර්ජුනා වෙනුවෙන් පෙනී සිටි නීතිඥ සේනානි දයාරත්න මහතා, තම සේවාදායකයාට එරෙහිව ඉල්ලා ඇති අතුරු තහනම් නියෝග සම්බන්ධයෙන් විරෝධතා ගොනු කිරීමට කාලයක් ඉල්ලා සිටියේය.
පෙත්සම්කරු වෙනුවෙන් පෙනී සිටි නීතිඥ අශෝක බරන් මහතා හදිසි නඩු කටයුත්තක් ලෙස සලකා කඩිනම් දිනයක් ලබා දෙන ලෙස ඉල්ලීමක් කළේය.
අධිකරණය විසින් වග උත්තරකරුවන්ට පෙබරවාරි 28 වන දිනට පෙර විරෝධතා ගොනු කිරීමටත්, ප්‍රතිවිරෝධතා මාර්තු 30 වන දිනට පෙර ගොනු කිරීමටත් නියම කරන ලදී. පෙත්සම සාක්ෂි සහිතව විභාග කිරීම මැයි 14 වන දින සිදු කෙරෙනු ඇත.
පෙත්සම්කරු චෝදනා කරන්නේ රාමනාදන් අර්ජුනා මහතා රජයේ වෛද්‍යවරයෙකු ලෙස සේවය කරමින් ඉන් ඉවත් නොවී මහ මැතිවරණයට තරග කිරීම මගින් පාර්ලිමේන්තු මැතිවරණ පනත උල්ලංඝනය කර ඇති බවත්, එබැවින් ඔහුට මන්ත්‍රී ධුරයක් දැරීමට සුදුසුකම් නොමැති බවත්ය. ඒ අනුව එම මන්ත්‍රී ධුරය අවලංගු කරන ලෙස පෙත්සමෙන් ඉල්ලා සිටී.