රට තුළ භාවිතා කරන ලද වාහන සඳහා වන මිල ගණන් නැවතත් ඉහළ යන ප්‍රවණතාවයක් වාර්තා වෙමින් තිබේ. රජය විසින් හඳුන්වා දුන් නව බදු ක්‍රමය හේතුවෙන් ආනයනික වාහන මිල ගණන් සැලකිය යුතු ලෙස ඉහළ යාම මෙයට ප්‍රධාන හේතුව වී තිබේ.
පසුගිය දින කිහිපය තුළ දෙවන පෙළ වාහන වෙළඳපොළෙහි සැලකිය යුතු මිල අඩුවීමක් මෙන්ම අලෙවිය අඩුවීමක් ද දක්නට ලැබුණි. මෙයට හේතු වූයේ පැවති බදු අනුපාත යටතේම නව වාහන ආනයනය සිදුවනු ඇතැයි පාරිභෝගිකයන් තුළ පැවති බලාපොරොත්තුවයි.
කෙසේ වෙතත්, නව බදු ක්‍රමය හඳුන්වාදීමෙන් අනතුරුව ආනයනික වාහන මිල ඉහළ යාමත් සමඟ භාවිත කළ වාහන මිල ද ඉහළ ගොස් තිබේ. මෙම මිල ඉහළ යාම දිවයිනේ ප්‍රමුඛ වාහන අලෙවි වෙබ් අඩවි කිහිපයක් ඔස්සේම තහවුරු කර ගත හැක.