ෆේස්බුක් සහ ඉන්ස්ටග්‍රෑම් ඇතුළු සමාජ මාධ්‍ය තුළ ප්‍රවර්ධනය කරමින් තිබෙන වංචනික ‘ක්‍රිප්ටෝ’ මුදල් ව්‍යාපාර පිළිබඳව අග්‍රාමාත්‍ය කාර්යාලයෙන් විශේෂ නිවේදනයක් නිකුත් කර ඇත.
මෙම වංචනික දැන්වීම් සමාජ මාධ්‍ය හරහා ප්‍රවර්ධනය කරමින් විදේශීය ආයතන විසින් මෙරට ජනතාව නොමඟ යවන බව එහි දැක්වේ.
අග්‍රාමාත්‍ය ආචාර්ය හරිනි අමරසූරිය සහ අනෙකුත් ප්‍රසිද්ධ ශ්‍රී ලාංකික පුද්ගලයින්ගේ නම් භාවිත කරමින් මෙම වංචාසහගත ප්‍රචාරණ සිදුකරමින් සිටින බවද නිවේදනයේ සඳහන් වේ.
විශේෂයෙන් ප්‍රසිද්ධ පුද්ගලයින් පිළිබඳ ජනතාව තුළ ඇති සුහඳතාව පළුදු කරමින්, මහජනතාව නොමඟ යවා, ප්‍රසිද්ධ පුද්ගලයින් කෙරෙහි ඇති විශ්වාසය බිඳ දැමීම මෙම දැන්වීම්වල ප්‍රධාන අරමුණ වී තිබේ.
ලිතුවේනියාවේ සිට ක්‍රියාත්මක කරන මෙම වංචනික ගිණුම් මගින් සිදු කරන වංචනික දැන්වීම් සහ ප්‍රවර්ධනයන් ශ්‍රී ලංකාවේ ෆේස්බුක් භාවිතා කරන්නන් ඉලක්ක කරමින් සක්‍රියව ක්‍රියාත්මක වෙමින් තිබෙන බව අපගේ අවධානයට යොමු වී ඇත.
මෑතකදී විදේශ අමාත්‍ය විජිත හේරත්, විද්‍යා හා තාක්ෂණ අමාත්‍ය පාර්ලිමේන්තු මන්ත්‍රී ක්‍රිශාන්ත අබේසේන සහ ප්‍රසිද්ධ මාධ්‍යවේදීන් වන අමන්තා පෙරේරා සහ සුනන්ද දේශප්‍රිය මෙන්ම මීට පෙර අවස්ථාවලදී වෙනත් ශ්‍රී ලාංකික ප්‍රසිද්ධ පුද්ගලයින්ද මෙම දැන්වීම් මගින් ප්‍රචාරණය කර ඇති බව සඳහන් වේ.
විශේෂයෙන්ම රජයේ නිලධාරීන් සහ ප්‍රසිද්ධ පුද්ගලයින්ගේ අනුමැතිය ඇතැයි අසත්‍ය ලෙස ප්‍රකාශ කරන ක්‍රිප්ටෝ මුදල් ආයෝජන ප්‍රවර්ධනය කරන ඔන්ලයින් දැන්වීම්වලින් අතිශයින් ප්‍රවේශම් වන ලෙස පුරවැසියන්ගෙන් ඉල්ලා සිටී.
කිසිදු රජයේ නිලධාරියෙකු හෝ අමාත්‍යාංශයක් කිසිදු ක්‍රිප්ටෝ මුදල් ආයෝජන යෝජනා ක්‍රමයක් අනුමත කර නොමැති බවද දැක්වේ.
තවද, වාර්තා සහ ඉවත් කිරීමේ ඉල්ලීම් තිබියදීත්, මෙම වංචාවන් සමාජ මාධ්‍ය වේදිකාවල දිගින් දිගටම දක්නට ලැබෙන අතර, වංචනික දැන්වීම් ඵලදායී ලෙස මැඩපැවැත්වීමට ෆේස්බුක්හි ඇති නොහැකියාව පිළිබඳ බරපතල සැකයක් සහ කනස්සල්ලක් ඇති වී තිබේ.
මෙම රැවටිලිකාර ව්‍යාපාර පැතිරීම වැළැක්වීමට සහ ශ්‍රී ලාංකික පරිශීලකයින් මූල්‍ය වංචාවෙන් ආරක්ෂා කිරීමට වහාම දැඩි ක්‍රියාමාර්ග ගන්නා ලෙස මෙටා ෆේස්බුක්හි මව් සමාගම වන මෙටා සමාගම වෙතින් ඉල්ලා සිටී.
ප්‍රසිද්ධ පුද්ගලයින්ගේ අනුමැතිය ඇතැයි කියන සැක සහිත දැන්වීම් සමඟ සම්බන්ධ නොවන ලෙසත්, එම ප්‍රවර්ධනයන් හෝ දැන්වීම් තුළට නොයන ලෙසත්, ෆේස්බුක් සහ ඉන්ස්ටග්‍රෑම්හි වංචනික දැන්වීම් කෙලින්ම අදාල සමාගම් වෙත වාර්තා කරන ලෙසත්, ආයෝජනය කිරීමට පෙර නීත්‍යානුකූල මූලාශ්‍ර හරහා සියලුම මූල්‍ය අවස්ථා සනාථ කර ගන්නා ලෙසත් මහජනතාවගෙන් ඉල්ලා සිටී.
අග්‍රාමාත්‍ය කාර්යාලය ලෙස අන්තර්ජාලය මගින් සිදු කරන වංචාවන්ගෙන් මහජනතාව ආරක්ෂා කිරීමට කැපවී ක්‍රියාකරන අතර මෙම ගැටලුව විසඳීමට අදාළ බලධාරීන් සමඟ දිගටම කටයුතු කරන බව දන්වා සිටී.
වැරදි තොරතුරු සහ වංචනික තොරතුරු ප්‍රචාරය කිරීම සිදු නොකරන ලෙසත්, එවැනි ප්‍රචාරයන් පිළිබඳ වගකීමෙන් යුතුව ක්‍රියා කරන ලෙසත් සියලු ජනමාධ්‍ය සංවිධාන සහ සමාජ මාධ්‍ය ක්‍රියාකාරිකයින්ගෙන් ඉල්ලා සිටී.
රජයේ නිල තොරතුරු දැනගැනීම සඳහා යාවත්කාලීන අග්‍රාමාත්‍ය කාර්යාලයේ නිල වෙබ් අඩවිය සහ සමාජ මාධ්‍ය නාලිකාව වෙත යොමු වන ලෙස මෙරට සියලු මහජනතාවට දැනුම් දෙයි.