මිත්‍ර රාජ්‍ය නායකයකුට ශ්‍රී ලංකාව විසින් පිරිනැමිය හැකි ඉහළම සම්මානය වන මිත්‍ර විභූෂණ සම්මානය අද ඉන්දීය අග්‍රාමාත්‍ය නරේන්ද්‍ර මෝදි ජනාධිපති අනුර කුමාර දිසානායක මහතාගේ අතින් ලබා ගත්තේය. මෙම ගෞරවනීය සම්මාන උළෙල ඉන්දීය අග්‍රාමාත්‍යවරයාගේ ශ්‍රී ලංකා සංචාරය අවස්ථාවට සමගාමීව ජනාධිපති කාර්යාලයේදී පැවැත්විණි.
මෙම අවස්ථාවේදී දෙරට අතර අවබෝධතා ගිවිසුම් අත්සන් තැබීම සහ දෙරටේ නායකයන්ගේ ඒකාබද්ධ ජනමාධ්‍ය හමුවද සිදුවිය.
මිත්‍ර විභූෂණ සම්මානය ශ්‍රී ලංකාවේ සංස්කෘතික සංකේත සහිත උතුම් සම්මානයක් වන අතර, එහි ගොයම් කරල, හිරු සහ සඳු යන ජාතික සංකේත අන්තර්ගත වේ. එමෙන්ම, සෙන්ටිමීටර 6.5 ක විශ්කම්භයකින් යුත් වට්ටෝරු නව රත්න මැණිකක් එයට බඳුන් කර ඇත.