ශ්‍රී ලංකාවේ නව COVID – 19 ප්‍රභේදයක් ව්‍යාප්ත වීමේ අවදානමක් නොමැති නිසා අනිසි බියක් ඇති කර ගැනීමට අවශ්‍ය නොවන බව සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා නිවේදනයක් නිකුත් කරමින් ජනතාවට දැනුම් දෙයි.
වසංගත රෝග විද්‍යා අංශයේ දත්ත පදනම් කර ගනිමින් ඒ මහතා මෙම නිවේදනය නිකුත් කර තිබේ.
පසුගිය සති කිහිපයේදී ආසියානු රටවල් කිහිපයක COVID – 19 ආසාදිතයන් සංඛ්‍යාවේ ඉහළ යෑමක් පෙන්නුම් කර ඇති බව මාධ්‍ය වාර්තා කර තිබුණු බවත් මෙම තත්ත්වය යටතේ ප්‍රජාව තුළ රෝගයට මුහුණදීමේ ඇති හැකියාව අඩු වීම ඇතුළු සාධක කිහිපයක් හේතු විය හැකි බවත් මෙය සැලකිල්ලට ගනිමින් සෞඛ්‍ය අමාත්‍යාංශය ජාතික මට්ටමින් සූදානම් වීම සහ මහජන සෞඛ්‍ය ආරක්ෂා කිරීම සඳහා අවශ්‍ය පියවර තීව්‍ර කර ඇති බවත් අමාත්‍යාංශ ලේකම්වරයා නිකුත් කළ එම නිවේදනයේ සඳහන් වේ.
ලේකම්වරයාගේ නිවේදනයට අනුව COVID – 19 සඳහා සායනික සාම්පල පරීක්ෂා කරනු ලබන ඒකාබද්ධ ශ්වසන ආවේක්ෂණය රට පුරා තෝරාගත් රෝහල්වල අඛණ්ඩව සිදුවෙමින් පවතී. එමෙන්ම ආවේක්ෂණයට අනුව දැනට COVID-19 රෝගීන්ගේ වැඩි වීමක් පෙන්නුම් නොකරයි. තවද ශ්‍රී ලංකාවේ ඇති විය හැකි වසංගත තත්ත්වයන් කල් තියා හඳුනා ගැනීමට අවශ්‍ය රසායනාගාර ආවේක්ෂණ පද්ධතිය ද සක්‍රියව ක්‍රියාත්මක වන බව නිවේදනයේ දක්වා ඇත.
කලින් කලට විවිධ ශ්වසන රෝග මෙන්ම, COVID-19 රෝගීන්ගේ වැඩි වීමක් ඇති විය හැකි බව ද දැනට සාමාන්‍ය ජනතාවට ඇති අවදානම අඩු මට්ටමක පවතන බව ද කෙසේ වෙතත් වැඩිහිටියන්, ප්‍රතිශක්තිකරණය අඩු පුද්ගලයන් සහ නිදන්ගත රෝග ඇති පුද්ගලයන් වැනි වැඩි අවදානමට ලක්විය හැකි කණ්ඩායම් කෙරෙහි විශේෂ අවධානයකින් සිටීම වැදගත් බව ද එම නිවේදනයේ සඳහන් කර ඇත.
නිතර අත් සේදීම, කැස්ස සහ කිවිසුම් යන විට නාසය සහ මුඛ ආවරණය කිරීම ඇතුළු මූලික සනීපාරක්ෂක පිළිවෙත් සහ ශ්වසන ආචාර විධි නිරන්තරයෙන් පවත්වාගත යුතු බව ද එම නිවේදනයේ සඳහන් කර තිබේ. සෞඛ්‍ය අමාත්‍යාංශය මඟින් නිවැරදි සහ කාලීන තොරතුරු මහජනතාවට ලබාදීම සඳහා මනා සූදානමකින් පසුවන අතර, ඇති විය හැකි වසංගත තත්ත්වයන්ට මුහුණ දීම සඳහා රෝහල් පද්ධතිය ද සූදානම් කර ඇත.
COVID-19 තත්ත්වය කාලයත් සමඟ සිදුවන වෙනස්කම් පිළිබඳ සෞඛ්‍ය බලධාරීන් අවධානයෙන් සිටින අතර, ඔවුන් නිල වශයෙන් ලබාදෙන තොරතුරු කෙරෙහි පමණක් අවධානය යොමු කරන ලෙස ද සෞඛ්‍ය හා ජනමාධ්‍ය අමාත්‍යාංශයේ ලේකම්වරයා මහජනතාවගෙන් ඉල්ලා සිටියි.