අමෙරිකාවේ ඉවසීම අඩුවෙමින් පවතින බැවින් කොන්දේසි විරහිතව යටත් වන ලෙස ජනාධිපති ඩොනල්ඩ් ට්‍රම්ප් ඉරානයේ ආධ්‍යාත්මික නායක අයතුල්ලා අලි කමේනිට අනතුරු අඟවා ඇතැයි විදෙස් මාධ්‍ය වාර්තා කරයි.
ඉරාන නායකයා රැඳී සිටින ස්ථානය නිශ්චිත වශයෙන්ම දන්නා බවත්, ඔහු ඉතා පහසු ඉලක්කයක් බවත් සඳහන් කර ඇති අමෙරිකානු ජනාධිපතිවරයා මෙවැනි මොහොතක ඉරාන නායකයා ඝාතනය කිරීමේ සූදානමක් නැති බව ප්‍රකාශ කළ බව ද විදෙස් මාධ්‍ය වැඩිදුරටත් වාර්තා කරයි.
ඉහළ මට්ටමේ ගුවන් ආරක්ෂණ පද්ධතියක් සහ අනෙකුත් උපකරණ
ඉරානය සතුවූවද, එය අමෙරිකානු තාක්ෂණයට සමාන කළ නොහැකි බවත්, මේ වනවිට ඉරාන ගුවන් සීමාව සම්පූර්ණයෙන්ම පාලනය කර ඇති බවත් ඔහු එක්ස් සමාජ මාධ්‍යජාලයේ සටහන් කර තිබේ.
මේ අතර ඉරාන යුද ශක්තිය විනාශ කිරීම සඳහා ඩොනල්ඩ් ට්‍රම්ප් ඉදිරි පියවර ගනු ඇතැයි උපජනාධිපති ජේ.ඩී.වැන්ස් ප්‍රකාශ කර ඇත. ඊශ්‍රායල හමුදාව පෙරේදා ඉරාන රජයේ රූපවාහිනී මධ්‍යස්ථානයට පහර දීමෙන් පැය කිහිපයකට පසු ඉරානය විසින් ඊශ්‍රායලයේ ටෙල් අවීව් සහ හයිෆා නගරවල ජනතාවට ඉවත්වන ලෙස අනතුරු අඟවීම් නිකුත් කරනු ලැබූ බවත්, අනතුරුව එම නගර ඉලක්ක කරමින් බැලැස්ටික් මිසයිල විශාල ප්‍රමාණයක් එල්ල කර ඇති බවත් වාර්තා වේ.