ටෙන්ඩර් පටිපාටියෙන් තොරව මාර්ග බලපත්‍ර ඉදිරියේදී ලබා නොදෙන බව ප්‍රවාහන, මහාමාර්ග, වරාය සහ සිවිල් ගුවන්සේවා ඇමැති බිමල් රත්නායක මහතා පාර්ලිමේන්තුවේදී ඊයේ (18) පැවසීය.
බස් රථ සඳහා මාර්ග බලපත් දීම දූෂිත සහ මාෆියාවක් ලෙස පසුගිය වසර කිහිපය පුරා ක්‍රියාත්මක වූ බවත් මාර්ගස්ථ මගී ප්‍රවාහන අධිකාරියේ බහුතර සංඛ්‍යාවක් කටයුතු කර තිබෙන්නේ මෙම ක්‍රමවේදයට බවත් ඇමැතිවරයා පැවසුවේය.
මාර්ගස්ථ මගී ප්‍රවාහන අධිකාරියට අයත් බස් රථ ධාවනය කිරීම සම්බන්ධයෙන් ජාතික ජන බලවේගයේ කුරුණෑගල දිස්ත්‍රික් මන්ත්‍රී සුජීව දිසානායක මහතා වාචිකව ඇසූ ප්‍රශ්නයට පිළිතුරු දෙමින් ඇමැතිවරයා මේ බව කියා සිටියේය.
පසුගිය කාලයේදී බස් රථ මාර්ග බලපත්‍ර ලබාදීම සම්බන්ධයෙන් විගණනයක් සිදු කර එම කරුණු ඉදිරියේදී රටට හෙළිදරව් කිරීමට බලාපොරොත්තු වන බවත් ඉදිරියේදී කිසිදු රූට් පර්මිට් එකක් ටෙන්ඩර් කිරීමකින් තොරව නොදෙන බවත් ඇමැතිවරයා පැවසුවේය.
ලංකා ගමනාගමන මණ්ඩලයේ බස් රථ සඳහා ඒකාබද්ධ කාලසටහන් ක්‍රමය ක්‍රියාත්මක කිරීම සම්බන්ධයෙන් අවධානය යොමු කර ඇතැයි ද අමාත්‍යවරයා කීය.
දැනට දකුණු පළාතේ ඒකාබද්ධ කාලසටහන් ක්‍රමය ක්‍රියාත්මක වන අතර, ඉදිරියේදී පුත්තලම් දිස්ත්‍රික්කයේදී ද මෙම ක්‍රමය ක්‍රියාත්මක කරන බවත් පසුගිය සමයේ ලංගම ආයතනය හොර රහසේ විනාශ කර ඇති බවත් ඇමැතිවරයා ප්‍රකාශ කළේය. ලංගම බස් රථ සඳහා ක්‍රමයෙන් ඒකාබද්ධ කාලසටහන් ක්‍රමය ක්‍රියාත්මක කරන බවත් ග්‍රාමීය මාර්ගවල තිබෙන ගැමිසැරිය බස් සේවාව ඉදිරියේදී ක්‍රමවත්ව ක්‍රියාත්මක කර බස් රථ ධාවනය නොවන දුෂ්කර සහ ග්‍රාමීය ප්‍රදේශවල බස් රථ ධාවනය කිරීමට අපේක්ෂා කරන බවත් ඇමැතිවරයා පැවසුවේය.