රුපියල් ලක්ෂ 369කට අධික ආදායම් බදු නොගෙවීම සම්බන්ධයෙන් 2023 වර්ෂයේ දේශීය ආදායම් දෙපාර්තමේන්තුව විසින් පවරා තිබූ නඩුවකට ඊයේ දින අධිකරණයේ පෙනී නොසිටි හිටපු පාර්ලිමේන්තු මන්ත්‍රී සජින් ද වාස් ගුණවර්ධන අත්අඩංගුවට ගෙන අධිකරණයට ඉදිරිපත් කරන ලෙසට කොළඹ අතිරේක මහේස්ත්‍රාත් පවිත්‍රා සංජීවනී මහත්මිය ඊයේ(23) වරෙන්තු නිකුත් කළාය.
වගඋත්තරකරුට සිතාසි භාරදී ඇති මුත් අධිකරණයේ පෙනී සිට නොමැති බව
දේශීය ආදායම් දෙපාර්තමේන්තුව වෙනුවෙන් අධිකරණයේ පෙනී සිටි නීතිඥ දිනේෂ් පෙරේරා මහතා අධිකරණයට දැනුම් දීමෙන් අනතුරුව මෙලෙස නියෝග කෙරිණි.
ව්‍යාපාරිකයකු වූ සජින් ද වාස් ගුණවර්ධන 2010-2012 වර්ෂවලට අදාළව ආදායම් බදු නොගෙවීම් සම්බන්ධයෙන් දේශීය ආදායම් දෙපාර්තමේන්තුව විසින් 2023 වර්ෂයේ දී නඩු පවරා තිබුණි. සිද්ධිය සම්බන්ධයෙන් වැඩිදුරටත් කරුණු දැක්වූ දේශීය ආදායම් දෙපාර්තමේන්තුව වෙනුවෙන් අධිකරණයේ පෙනී සිටි නීතිඥවරයා සඳහන් කරනු ලැබුවේ, මීට පෙර අභියාචනාධිකරණය මගින්ද අතුරු තහනම් නියෝගයක් නිකුත් කර තිබූ අතර පසුව එම පෙත්සම ඉවත දමා ඇති බවයි.
එම නියෝගයට එරෙහිව ශ්‍රේෂ්ඨාධිකරණයේ විශේෂ අභියාචනා පෙත්සමක් ඉදිරිපත් කර ඇතත්, මෙතෙක් මහේස්ත්‍රාත් අධිකරණයේ
කටයුතු අත්හිටුවා නියෝගයක් කර නොමැති බව දේශීය ආදායම් දෙපාර්තමේන්තුව වෙනුවෙන් අධිකරණයේ පෙනී සිටි නීතිඥවරයා වැඩිදුරටත් අධිකරණයට කරුණු දැක්වීය.
ඉදිරිපත් වූ කරුණු සලකා බැලූ අතිරේක මහේස්ත්‍රාත්වරිය විත්තිකරු අධිකරණයට ඉදිරිපත් කරන ලෙසට නියෝග කරමින් වරෙන්තු නිකුත් කළාය.