2025 කාන්තා ලෝක කුසලාන ක්‍රිකට් තරගාවලියේ පස්වැනි තරගය ලෙස ශ්‍රී ලංකාව සහ ඔස්ට්‍රේලියාව අතර තරගය අද (04) කොළඹ ආර්. ප්‍රේමදාස ක්‍රීඩාංගනයේදී පැවැත්වේ. පස්වරු 3ට ආරම්භ වන මෙම තරගය කණ්ඩායම් දෙකම සඳහා තරගාවලියේ දෙවැනි අවස්ථාවයි.
ශ්‍රී ලංකා කාන්තා කණ්ඩායම මෙවර තරගාවලියේ පළමු තරගය ඉන්දීයාවට ලකුණු 59කින් පරාජය වුවා. ඔස්ට්‍රේලියාව නවසීලන්තයට එරෙහිව තම මුල් තරගය ලකුණු 89කින් ජයගත්තේය.
ඇතැම් ඉතිහාස විස්තර අනුව, ශ්‍රී ලංකාව සහ ඔස්ට්‍රේලියාව අතර මේ දක්වා පැවති එක්දින ජාත්‍යන්තර තරග 11ම ජයගත්තේ ඔස්ට්‍රේලියාවයි. එම කණ්ඩායම කාන්තා ලෝක කුසලාන ක්‍රිකට් ඉතිහාසයේ අවස්ථා 7කදී ශූරතාව දිනාගෙන ඇති අතර, අවසන් වරට පැවති තරගාවලියද ඔවුන්ගේ අතට ලැබුණි.
මෙම තරගාවලියේදී ශ්‍රී ලංකාවේ ක්‍රීඩා ලෝලීන්ට විශේෂ අවස්ථාවක් ලෙස සියලු තරග නොමිලේ නැරඹීමේ හැකියාව හිමිව ඇත. තරග සියල්ල සජීවීව විකාශය වනුයේ සිරස මාධ්‍ය ජාලයේ ටීවී වන් නාලිකාවෙන් සහ sirasatv.lk වෙබ් අඩවිය ඔස්සේය.