ගම්පහ, උඩුගම්පොළ ප්‍රදේශයේ බණ්ඩාරනායක අනුස්මරණ පොදු පුස්තකාලය ඉදිරිපිටදී තමන් ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාගේ ඥාතියකු යැයි පවසමින් පොලිස් නිලධාරීන්ගේ රාජකාරියට බාධා කරමින් කළහකාරීව හැසිරුණු කාන්තාව අද (03) යළි ගම්පහ අධිකරණයට ඉදිරිපත් කිරීමට නියමිතයි.
රථවාහන වරදක් සම්බන්ධයෙන් පොලිස් නිලධාරීන් විසින් මෝටර් රථය නතර කිරීමට උත්සාහ කළ අවස්ථාවේදී ඔවුන්ගේ අණ නොතකා රිය ධාවනය කළ ඇය උඩුගම්පොළ, මිනුවන්ගොඩ ප්‍රදේශයේදී අත්අඩංගුවට ගෙන අධිකරණයට ඉදිරිපත් කිරීමෙන් පසු ගම්පහ වැඩබලන මහේස්ත්‍රාත් තුසිත සෙනරත් මහතා ඇය අද (03) තෙක් රක්ෂිත බන්ධනාගාරගත කරන ලෙස නියෝග කළා.
මෙසේ බන්ධනාගාරගත කර සිටියේ කොළඹ 5, තිඹිරිගස්යාය ප්‍රදේශයේ පදිංචි ව්‍යාපාරික කාන්තාවක්.
සැකකාර කාන්තාව උඩුගම්පොළ ප්‍රදේශයේදී රාජකාරියේ නියුතු පොලිස් නිලධාරීන්ට සිදු කළ අයුතු අවහිරය ඇතුළු චෝදනා කිහිපයක් ඔස්සේ අත්අඩංගුවට ගෙන වැඩිදුර වාර්තාවක් ඉදිරිපත් කරමින් අධිකරණයට ඉදිරිපත් කර තිබුණා.
ඇයට වාහනය නතර කරන ලෙස සංඥා කළ ද එම පොලිස් අණ නොතකා පලා ගොස් ඇති අතර, පොලිස් නිලධාරීන් ඇය ලුහුබැඳ ගොස් උඩුගම්පොළදී නතර කර පරීක්ෂා කිරීමට උත්සාහ ගන්නා අවස්ථාවේ මේ කලහය සිදුව තිබෙනවා.
මේ කාන්තාව රථවාහන නීති කඩකරමින් වාහනය ධාවනය කළ බවටත්, පරීක්ෂා කිරීමට යෑමේදී කලහකාරීව හැසිරුණු බවටත් පොලීසිය අධිකරණයට කරුණු දක්වා තිබෙනවා.
සැකකාරිය කළහකාරී ලෙස හැසිරෙන ආකාරය දැක්වෙන වීඩියෝ පටයක් සමාජ මාධ්‍ය ඔස්සේ ද පලවී තිබෙනවා.