ඇමැති ජනක බණ්ඩාර තෙන්නකෝන්
පවතින වසංගත තත්ත්වය සමනය වීමත් සමඟ රට සංවර්ධනය කරා ගෙන යෑමට යටිතල පහසුකම් සංවර්ධනය කර පැවතිය යුතු බව රාජ්‍ය සේවා පළාත් සභා හා පළත් පාලන ඇමැති ජනක බණ්ඩාර තෙන්නකෝන් මහතා පවසයි.
ඇමැතිවරයා මේ බව පැවැසුවේ වාරි සෞභාග්‍යා වැඩසටහන යටතේ දඹුල්ල, සළුඅපුල්ලන වැවේ ප්‍රතිසංස්කරණ කටයුතු අරඹමිනි.
මේ සංවර්ධන ව්‍යාපෘතියට වැය කරන මුදල මිලියන 5කි.
එහිදී වැඩිදුරටත් අදහස් දැක්වූ ඇමැතිවරයා මෙසේ ද කීය.
“අද මුළු ලෝකයම දරුණු වසංගත තත්ත්වයකට මුහුණ දී සිටිනවා. අපිත් මේ වන විට විශාල අවදානමකට මුහුණ දී සිටිනවා. ලෝකයේ දියුණුම රටවල් පවා මේ වසංගත තත්ත්වය තුළ අසරණ වෙලා. අපි රටක් විදියට තවමත් ශක්තිමත්ව මේ තත්ත්වයට මුහුණ දෙමින් ඉන්නවා. අපිව විවේචනය කරන සමහර දේශපාලන පක්ෂ පසුගිය කාලයේ මේ රටට කළ දේවල් අමතක කරන්න බෑ. මහ දවල් මහ බැංකු මංකොල්ල කෑ අය, බස් ට්‍රාන්ස්පෝමර් ගිනි තියපු අය අද අපිව ෆේල් කරන්න උත්සාහ දරනවා. බොර දියේ මාළු බාන මේ උදවිය අද උද්ඝෝෂණවලට උල්පන්දම් දෙමින් රජය සාර්ථකව කරගෙන යන එන්නත්කරණ වැඩසටහන අසාර්ථක කරන්න උත්සාහ දරනවා.
මේ කවර තත්ත්වයක් පැවතියත් රට සංවර්ධනය කරන කටයුත්ත ආ පස්සට දාන්න බෑ. යටිතල පහසුකම් ටික, සේවා සැපයුම් අංශ මේ සියල්ල කාර්යක්ෂම කිරීමේ වුවමනාව අපට තිබෙනවා. ඒ නිසයි, මේ සංවර්ධන කටයුතු සිදු කරන්නේ. අද කරන මේ සංවර්ධන ව්‍යාපෘතිවල ප්‍රතිඵල ලැබෙන්නේ තව වසර කිහිපයකින්.”
මහින්ද අලුත්ගෙදර