අපරාධ පරීක්ෂණ දෙපාර්තමේන්තුව මගින් සමාජ ක්‍රියාකාරි ෂෙහාන් මාලක අත්අඩංගුවට ගනු ලැබුවේ නීතිපතිවරයා ලබාදුන් උපදෙස් අනුව බව පොලිස් මාධ්‍ය ප්‍රකාශක කාර්යාලය නිවේදනයක් නිකුත් කරමින් පවසයි.
පසුගිය වසරේ අගෝස්තු 17 වැනිදා ඔහු විසින් පවත්වන ලද මාධ්‍ය සාකච්ඡාවකදී සඳහන් කළ කරුණු පිළිබඳව දීර්ඝ විමර්ශනයක් කර අදාළ ගොනු නීතිපති උපදෙස් වෙත යොමුකළ බව පොලිස් මාධ්‍ය ප්‍රකාශක කාර්යාලය නිකුත් කළ එම නිවේදනයේ වැඩිදුරටත් දැක්වෙයි.
ඒ අනුව ඔහු ශ්‍රී ලංකා දණ්ඩ නීති සංග්‍රහයේ 120 වගන්තිය යටතේ වරදක් සිදුකර ඇති බවත් ඔහු අත්අඩංගුවට ගෙන අධිකරණයට ඉදිරිපත් කරන ලෙස පසුගිය 24 වැනිදා නීතිපති විසින් අපරාධ පරීක්ෂණ දෙපාර්තමේන්තුවට උපදෙස් දුන් බවත් එම නිවේදනයේ සදහන්ය.