යුක්රේන ජනාධිපති සෙලෙන්ස්කි විසින් අගමැති මෝදි අමතා අර්බුදය විසඳීමට මැදිහත්වන ලෙස කළ ඉල්ලීමකට අනුව ඉන්දීය අග්‍රාමාත්‍ය නරේන්ද්‍ර මෝදි විසින් රුසියානු ජනාධිපති ව්ලැඩ්මීර් පුටින් වෙත දුරකථන ඇමතුමක් ලබා දී රුසියානු – යුක්රේන ආක්‍රමණය පිළිබඳව විමසීමක් කර ඇති බව විදෙස් මාධ්‍ය වාර්තා කරයි.
එම දුරකතන සංවාදයේදී යුක්රේනයේ ගැටුම් වහා නතර කිරීමට පියවර ගන්නා ලෙස ඉන්දීය අග්‍රාමාත්‍යවරයා ප්‍රකාශ කර තිබේ.
“සියලු පාර්ශවයන් සාකච්ඡා මාර්ගයට පිවිසීම වැදගත්. රුසියාව සහ නේටෝ සංවිධානය සිය ගැටලු රාජතාන්ත්‍රික මට්ටමින් විසඳා ගත යුතුයි.” යනුවෙන් එහිදී අගමැති මෝදි පුටින්ට පවසා ඇති බව වාර්තා වෙයි.
මේ වනවිට යුක්රේනයේ කියෆ් අගනුවරට මිසයිල ප්‍රහාර අඛණ්ඩව එල්ල වන බව විදෙස් මාධ්‍ය වැඩිදුරටත් ප්‍රකාශ කරයි.