පොළොන්නරුව වැලිකන්ද කාලිංගවිල ප්‍රදේශයේදී අද (17) අලුයම ඉසෙඩ් ඩී ප්‍රධාන ඇළට වැටී සිටි අලි දෙදෙනෙකු ගොඩට පැමිණීමත් සමඟ ඉන් එක් අලියෙකු අසළ තිබූ යතුරු පැදියට පහර දී විනාශ කර කාලිංගවිල රක්ෂිතයට පලා ගිය බව වැලිකන්ද වනජීවී නිලධාරීන් පවසයි.
බීමට ජලය සොයා පැමිණි එම අලි දෙදෙනා වැලිකන්ද මෛත්‍රීගම ප්‍රදේශයෙන් ඉසෙඩ් ඩී ඇළට වැටී ඇති අතර වැලිකන්ද වනජීවී නිලධාරීන්, සිවිල් ආරක්ෂක නිලධාරීන් හා ප්‍රදේශ්වාසීන් එක්ව එම අලි දෙදෙනා ගොඩගැනීම සඳහා පැය දෙකක පමණ මෙහෙයුමක් ක්‍රියාත්මක කර තිබේ.
එක් අලියෙකු ඉසෙඩ් ඩී ඇළේ කොන්ක්‍රීට් පඩිපෙළ හරහා ගොඩට විත් කාලිංගවිල රක්ෂිතයට පලා ගිය අතර අනිත් අලියා ගොඩගැනීමට වනජීවී නිලධාරීන් මෙන්ම සිවිල් ආරක්ෂක බලකාය සූදානම් වීමත් සමග තවත් යකඩ පඩිපෙළකින් අනෙක් අලියා ගොඩටවිත් අසළ තිබූ යතුරු පැදියට පහරදී අලිවැට කඩාගෙන කාලිංගවිල රක්ෂිතයට පලා ගොස් තිබේ.
වනජීවී නිලධාරීන් පැමිණි කැබ් රථය පිටුපස මෙම අලියා ලුහුබැද පන්නන්නට උත්සාහ කිරීමත් සමඟ අහසට වෙඩි තබා එය මෙල්ල කිරීමට වනජීවී නිලධාරීන් සමත් වී ඇති අතර ඉන් අනතුරුව අලියා කාලිංගවිල රක්ෂිතයට පලවා හැර තිබේ.
