නාමල් රාජපක්ෂ ඇතුළු විත්තිකරුවන් හය දෙනෙකුට එරෙහිව නීතිපතිවරයා විසින් ගොනුකර ඇති නඩුව වැඩිදුර විභාගය සඳහා සැප්තැම්බර් 14 වැනිදාදා කැඳවන ලෙස කොළඹ මහාධිකරණය අද (28) නියම කළේය.
කොළඹ මහාධිකරණ විනිසුරු නවරත්න මාරසිංහ ඉදිරියේ එම නඩුව අද කැඳවනු ලැබූ අතර ඒ සඳහා නාමල් රාජපක්ෂ ඇතුළු විත්තිකරුවන් අධිකරණයේ පෙනී සිටියේය.
එහිදී නඩුවේ වැඩිදුර සාක්ෂි විභාගය සැප්තැම්බර් 14 වැනිදා කැඳවීමට නියම කළ අතර සාක්ෂිකරුවන්ට එදින අධිකරණයේ පෙනී සිටින ලෙස දන්වා සිතාසිද නිකුත් කළේය.
පාර්ලිමේන්තු මන්ත්‍රීවරයෙකු වශයෙන් කටයුතු කරමින් සිටියදී අයථා ලෙස උපයාගත් රුපියල් මිලියන 30ක මුදලක් ගවර්ස් කෝපරේට් සමාගමේ ආයෝජනය කිරීම තුළින් මුදල් විශුද්ධිකරණය වැළැක්වීමේ පනත යටතේ වරදක් සිදුකළේ යැයි චෝදනා කොට හිටපු අමාත්‍ය නාමල් රාජපක්ෂ ඇතුළු විත්තිකරුවන් හය දෙනෙකුට එරෙහිව නීතිපතිවරයා විසින් ඉකුත් යහපාලන රජය සමයේ එම නඩුව ගොනුකර තිබුණි.