දිවයින පුරා පෞද්ගලික රෝහල්වල ඖෂධ වර්ග හිඟවීම නිසා හදිසි ශල්‍යකර්ම පමණක් කිරීමට රෝහල් සහ සාත්තු නිවාස පෞද්ගලික සංගමය තීරණය කර තිබේ.
ඒ අනුව මේ වනවිට දිවයින පුරා පෞද්ගලික රෝහල් 200ක ඖෂධ වර්ග 76ක හිඟයක් පවතී. ඖෂධ සහ ශල්‍ය වෛද්‍ය උපකරණ හිඟය පිළිබඳ සෞඛ්‍ය අමාත්‍යාංශය හා පෞද්ගලික සෞඛ්‍ය සේවා නියාමන සභාව දැනුවත් කර ඇති බව එම සංගමයේ සභාපති ආචාර්ය ආන්නද කුරුප්පුආරච්චි නිවේදනයක් නිකුත් කරමින් පවසයි.
එසේම රට තුළ මේ වන විට පවතින උග්‍ර ඖෂධ හා වෛද්‍ය උපකරණ හිඟය හේතුවෙන් දිනෙන් දින අවදානමට ලක්වෙමින් පවතින අහිංසක රෝගීන්ගේ ජීවිත බේරාගැනීම සඳහා හැකි ඉක්මනින් ඖෂධ සහ වෛද්‍ය උපකරණ මෙරටට පරිත්‍යාග කරන ලෙසත් එම සංගමය විදෙස්ගත ශ්‍රී ලාංකිකයන් සහ වෙනත් දානපතියන්ගෙන් ඉල්ලා සිටියි.
විදෙස් සංචිත සිඳීයාමත්, ඩොලර් හිඟයත් හේතුවෙන් ඖෂධ සහ වෛද්‍ය උපකරණ ගෙන්වා ගැනීම බරපතල ප්‍රශ්නයක් වී ඇතැයි කියන එම සංගමය මේ වනවිට ශ්‍රී ලංකාවේ සමස්ත රෝහල් පද්ධතියම දැඩි අර්බුදයකට මුහුණදී තිබෙන බවද පවසයි.
