යළිත් වරක් ඩෙංගු රෝගයේ සීඝ්‍ර වර්ධනයක් පෙන්නුම් කරන බව ජාතික ඩෙංගු මර්දන ඒකකය පවසයි.
වසරේ මෙතෙක් ගතවූ මාස පහක කාලයේදී ඩෙංගු රෝගීන් 21,484 දෙනෙකු හඳුනාගෙන ඇති අතර පසුගිය සතිය තුළදී පමණක් දිවයින පුරා ඩෙංගු රෝගීන් 1,576 දෙනෙකු හදුනාගෙන තිබේ.
එය ඊට පෙර සතියට සාපේක්ෂව සියයට 21.8ක ඉහළ යාමක් බව ජාතික ඩෙංගු මර්දන ඒකකය සඳහන් කළේය.
ඉන් වැඩිම රෝගීන් සංඛ්‍යාවක් කොළඹ දිස්ත්‍රික්කයෙන් හදුනාගෙන ඇති අතර එම ගණන 409කි.
ජාතික ඩෙංගු මර්දන ඒකකය වැඩිදුරටත් සඳහන් කළේ ගම්පහ දිස්ත්‍රික්කයෙන් ඩෙංගු රෝගීන් 171ක්, කළුතර දිස්ත්‍රික්කයෙන් 157ක්, රත්නපුර දිස්ත්‍රික්කයෙන් 119ක් සහ මහනුවර දිස්ත්‍රික්කයෙන් රෝගීන් 113ක් හදුනාගෙන ඇති බවයි.