විදෙස් ගමන් තහනම් කළ හිටපු අග්‍රාමාත්‍ය මහින්ද රාජපක්ෂ ඇතුළු පිරිසක් තවමත් සිය ගමන් බලපත්‍ර අධිකරණයට භාර දී නොමැති බව අතිරේක සොලිසිටර් ජනරාල් අයේෂා ජිනසේන මහත්මිය පැවසුවාය.
ගෝඨාගෝගමට හා මයිනාගෝගමට පහරදීම සම්බන්ධයෙන් වන නඩු විභාගය කොටුව මහේස්ත්‍රාත් අධිකරණය හමුවේ විභාගයට ගත් අවස්ථාවේදී ඇය මේ බව පැවසුවාය.
එහිදී අනාවරණය වුණේ හිටපු අග්‍රමාත්‍ය මහින්ද රාජපක්ෂ, ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, මහින්ද කහඳගම ඇතුළු පිරිසක් මෙතෙක් අධිකරණයට සිය විදේශ ගමන් බලපත්‍ර භාරදීම සිදුකර නොමැති බවයි.
පවිත්‍රා වන්නිආරච්චි, නාමල් රාජපක්ෂ, සංජීව එදිරිමාන්න, රෝහිත අබේගුණවර්ධන ඇතුළු පිරිසක් සිය විදේශ ගමන් බලපත්‍ර අධිකරණය වෙත භාර දී ඇති අතර සැකකාර සනත් නිශාන්තගේ විදේශ ගමන් බලපත්‍රය නඩු කටයුත්තක් සම්බන්ධයෙන් වෙනත් අධිකරණයකට භාරදී ඇති බවත් එහිදී අනාවරණය වී තිබේ.
පාර්ලිමේන්තු මන්ත්‍රී ජොන්ස්ටන් ප්‍රනාන්දු සහ රේණුක පෙරේරා යන අය සිය විදේශ ගමන් බලපත්‍ර විනාශ වී ඇති බව අපරාධ පරීක්ෂණ දෙපාර්තමේන්තුවට දැනුම් දී තිබේ.