පෞද්ගලික බස් රථ ධාවනයට ඩීසල් ලබාදීමට රජය විධිමත් වැඩපිළිවෙළක් මේ සතිය තුළ සැකසිය යුතු බවත් එසේ සිදු කෙරෙන්නේ නැතිනම් එළඹෙන 06 වැනිදා සිට බස් රථ ධාවනයෙන් ඉවත් වන බව පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න පැවසීය.
ඔහු මේ බව ප්‍රකාශ කළේ කොළඹදී අද (01) පැවති මාධ්‍ය හමුවකට එක්වෙමිනි.
අපොස සාමාන්‍ය පෙළ විභාගය පැවැත්වෙන කාලසීමාව තුළදී පෞද්ගලික බස් රථ ධාවනය කිරීම සිදු කෙරුණත් ඒ සඳහාද ඩීසල් ලබා ගත්තේ ඉතා ගැටලුකාරී තත්ත්වයක සිට බවත් අද දින සාමාන්‍ය පෙළ විභාගය අවසන් වීම හේතුවෙන් මෙම තීරණයට එලැඹි බවත් ඔහු වැඩිදුරටත් කියා සිටියේය.
එමෙන්ම බස් රථ සඳහා ඩීසල් ලබාදීමට රජය විධිමත් වැඩපිළිවෙළක් සැකසිය යුතු බවත් එසේ නොවන්නේ නම් දිගින් දිගටම මේ ආකාරයෙන් ධාවනය කිරීමට නොහැකි බවද ඔහු කියා සිටියේය.
එමෙන්ම දැනට ධාවනය වන බස් රථ ප්‍රමාණයද එළඹෙන 6 වැනිදා දිනයෙන් පසු ධාවනය නොකිරීමට තීරණය කරන බව ඔහු අවධාරණය කළේය.
පසුගිය කාලසීමාව තුළදී සාමාන්‍ය පෙළ විභාගයට පෙනී සිටි දරුවන්ට බාධාවක් නොවන ආකාරයට උද්ඝෝෂණ හා විරෝධතා සිදු නොකර සිටි පුද්ගලයන්ට පමණි ස්තුති කරන බවද ඔහු එහිදී කියා සිටියේය.
එමෙන්ම ඊයේ (31) සිට බදු වැඩිකිරීමට රජය මගින් තීරණය කර ඇති අතර එය තම කර්මාන්තයටද දැඩි ලෙස බලපාන බව ඔහු ප්‍රකාශ කළේය.
ඒ හේතුවෙන් අමතර කොටස්වල මිලද ඉහළ යාමට ඇති ඉඩකඩ වැඩි බවත් බදු වැඩි කිරීම පසෙකලා පාඩු ලබන ආයතන විකිණීම හෝ වෙනයම් ක්‍රමවේදයකින් මෙම අලාභ අයකර ගැනීම සිදු කළ යුතු බවත් මෙසේ බදු වැඩිකිරීම හේතුවෙන් පීඩාවට පත් වන්නේ සාමාන්‍ය පොදු මහජනතාව බව ඔහු කියා සිටියේය.