සති දෙකකින් යළිත් බරපතල ඉන්ධන අර්බුදයක්

සති දෙකකින් පසු රට තුළ යළි බරපතළ ඉන්ධන අර්බුදයක් මතු විය හැකි බවට තෙල් සංස්ථාවේ නිලධාරීන් අනතුරු අඟවයි.

ඉන්දීය ණය යෝජනා ක්‍රමය මගින් ඊළඟ ඩීසල් නැව මෙරටට ගෙන ආවාට පසු රටේ අවශ්‍යතාව පිරිමසා ගැනීම සඳහා තෙල් ආනයනයට වැඩපිළිවෙළක් තාමත් සකසා නොමැති වීම මීට හේතුව වී ඇති බව ඔවුන් පවසයි.

ක්‍ෂණික මිලදී ගැනීම් යටතේ ඉන්ධන ලබා ගැනීමට යම් යම් සැලසුම් ක්‍රියාත්මක කළද සැපයුම්කාර සමාගම් ඒවාට ඉදිරිපත් නොවීම නිසා මෙම තත්ත්වය උද්ගත වී තිබේ.

මේ වන විට ලංකා ඛනිජ තෙල් සංස්ථාව සතුව ඔටෝ ඩීසල් මට්‍රික් ටොන් 18,825ක්, සුපර් ඩීසල් මෙට්‍රික් ටොන් 42ක්, ඔක්ටේන් 92 පෙට්‍රල් මෙට්‍රික් ටොන් 33,498ක්, ඔක්ටේන් 95 පෙට්‍රල් මෙට්‍රික් ටොන් 13,067ක් සහ ජෙට් A1(ගුවන්යානා තෙල්) මෙට්‍රික් ටොන් 386ක් තිබෙන බව විදුලිබල හා බලශක්ති ඇමති කංචන විජේසේකර ට්විටර් පණිවුඩයනි නිකුත් කරමින් සඳහන් කළ නමුත් එම ප්‍රමාණය සෑහෙන්නේ සති දෙකකට පමණ බව එම නිලධාරීන් අවධාරණය කරයි.