එරෝෆ්ලෝට් ගුවන්යානය රුසියාව බලා පියාසර කරවීම වළක්වන ලෙස දන්වමින් කටුනායක ගුවන්යානා පාලක මැදිරියේ ප්‍රධාන පාලක නිලධාරීවරයාට තර්ජනය කළ බව කියන නීතිඥවරයාට හා අධිකරණ පිස්කල්වරයාට එරෙහිව නඩු පැවරීමට අවශ්‍ය ක්‍රියාමාර්ග ගන්නා බව අධිකරණ බන්ධනාගාර කටයුතු හා ව්‍යවස්ථා ප්‍රතිසංස්කරණ අමාත්‍ය විජේදාස රාජපක්ෂ පැවසීය.
මෙම නීතිඥවරයා හා අධිකරණ පිස්කල්වරයා ඉහත සඳහන් කළ ගුවන් පාලක ප්‍රධාන නිලධාරීවරයාට තර්ජනය කළ බවට තොරතුරු මේ වන විට අනාවරණය වී ඇති අතර ඊට අදාළ වාර්තා ඉදිරි දින දෙක තුළදී ගෙන්වා ගෙන එම දෙදෙනාට එරෙහිව නීතිමය පියවර ගන්නා බවද විජේදාස රාජපක්ෂ කියා සිටියේය.
ඔවුන්ට එරෙහිව නීතිමය පියවර ගැනීමට හැකියාව ඇත්තේ අධිකරණ සේවා කොමිෂන් සභාවට වන අතර ඒ සම්බන්ධයෙන් අගවිනිසුරුවරයා අවශ්‍ය ක්‍රියාමාර්ග ගන්නා බව අමාත්‍යවරයා පැවසීය.
ගුවන්යානය පියාසර කරවීම වැළැක්වීමට පියවර නොගතහොත් අධිකරණයට අපහාස කිරීම යටතේ චෝදනා ගොනු කරන බවට අදාළ වී භික්ෂුවරයා හා පිස්කල්වරයා ගුවන් පාලක නිලධාරිවරයාට තර්ජනය කර ඇති බව අමාත්‍යවරයා අවධාරණය කළේය.
අධිකරණ ක්‍රියාමාර්ග සම්බන්ධයෙන් ප්‍රශ්න කිරීමට රජයට හැකියාවක් නොමැති නමුත් නිල වශයෙන් ප්‍රශ්න කිරීමට හැකියාවක් තිබෙන නිසා නීතිපතිවරයා මගින් අධිකරණය හමුවේ කරුණු දැක්වීම නිසා ගුවන් යානය පියාසර කර වීමට අත්හිටුවා තිබූ වාරණය ඊයේ (06) ඉවත් කර ගැනීමට හැකි වූ බව අමාත්‍යවරයා ප්‍රකාශ කළේය.
මෙම නියෝගය ලබා දීමේදී අධිකරණයෙන් කිසියම් අඩුපාඩුවක් සිදුව ඇති බව අධිකරණය පිළිගත් බවද ඒකපාර්ශවික වාරණ නියෝගය දෙනවිට අධිකරණය මීට වඩා දැඩි සැලකිල්ලෙන් යුතුව කටයුතු කළ යුතුව ඇති බවද රටේ පිළිගත් නීති පද්ධතිය අනුගමනය කළේ නම් එවැනි තත්වයක් උද්ගත වීමට ඉඩ නොතිබුන බව හෙතෙම පවසයි.