පොසොන් සමය හේතුවෙන් වැඩි මිලට අලෙවි කිරීමේ අරමුණ ඇතිව නීතිවිරෝධී අයුරින් ගබඩා කර, සඟවා තැබූ මත්පැන් තොගයක් කැකිරාව සතොස ආයතනය තුළ තිබී සොයාගෙන තිබේ.
කැකිරාව පොලිස් ස්ථානයේ නිලධාරීන් විසින් සිදුකරන ලද මෙහෙයුමකදී මෙම මත්පැන් තොගය සොයාගෙන ඇති අතර පොසොන් සමයේදී වැඩි මිලට අලෙවි කිරිම සඳහා අදාළ සේවකයා මෙම මත්පැන් තොගය සතොස ආයතනයේ වෙනම කාමරයක සඟවා තබා ගෙන සිට ඇති බව පොලිස් විමර්ශනවලදී අනාවරණය වී තිබේ.
අදාළ මත්පැන් තොගය ආයතනයේම ඇති මත්පැන් අලෙවිසල්වලින් ඉවත් කරගෙන කර ගෙන ඇති බවත් මෙලෙස නීති විරෝධීව සඟවා තිබූ මත්පැන් බෝතල් 93ක් එම ස්ථානයේ තිබී පොලිසිය සොයාගෙන ඇති බවත් සිදුකළ විමර්ශනවලදී අනාවරණය වී ඇත.
මෙම මත්පැන් තොගයේ වත්මන් වෙළඳපොළ වටිනාකම රුපියල් ලක්ෂ දෙකහමාරකට ආසන්න බව පොලිසිය පවසයි. මෙම මත්පැන් තොගය සන්තකයේ තබාගත් බව කියන 31 හැවිරිදි සතොස සේවකයකු අත්අඩංගුවට ගෙන තිබේ.