ඔමික්‍රොන් හි නව උප ප්‍රභේද දෙකක් වන BA.4 සහ BA.5 යුරෝපයේ පැතිරී ගිය අනෙකුත් කොරෝනා වෛරස් ප්‍රභේදවලට වඩා වේගයෙන් ව්‍යාප්ත වන බවත්, ඒවා ප්‍රමුඛ වනවිට වැඩි රෝහල්ගතවීම් සහ මරණවලට තුඩු දිය හැකි බවට යුරෝපා සංගමයේ රෝග නිවාරණ ඒජන්සිය අනතුරු අඟවා තිබේ.
බොහෝ යුරෝපා සංගම් රටවල් මේ වනවිට උප ප්‍රභේද දෙකේ අඩු අනුපාත හඳුනාගෙන ඇති නමුත් ප්‍රතිශතය ඉහළ ගොස් ඇත. විශේෂයෙන්ම මැයි 30දා වනවිට BA.5 87%ක් වාර්තා වූ පෘතුගාලය වැනි රටවල සමස්ත ආසාදනවල වැඩිවීමක් ඇති බව රෝග වැළැක්වීම සහ පාලනය පිළිබඳ යුරෝපීය මධ්‍යස්ථානය සඳහන් කරයි.
මාර්තු මාසයේදී ලෝක සෞඛ්‍ය සංවිධානයේ නිරීක්ෂණ ලැයිස්තුවට මෙම උප කාණ්ඩ දෙක එකතු කරන ලද අතර ECDC විසින් සැලකිලිමත් විය යුතු ප්‍රභේද ලෙසද නම් කර ඇත.
BA.4 සහ BA.5 ඔමික්‍රොන් උප ප්‍රභේදයන් හි අනෙකුත් ආකාරවලට වඩා දරුණු රෝග ඇතිවීමේ වැඩි අවදානමක් ඇති බවක් නොපෙනුණත්, ඉහළ සම්ප්‍රේෂණ අනුපාතවලින් ආසාදිතයන් සංඛ්‍යාව වැඩිවීම රෝහල්ගතවීම් සහ මරණ වැඩි වීමට හේතු වන බව ECDC පවසයි.
“BA.4 සහ BA.5 සඳහා වාර්තා වී ඇති වර්ධන වාසිය පෙන්නුම් කරන්නේ මෙම ප්‍රභේද ප්‍රමුඛ වනු ඇති බවයි” ECDC වෙබ් අඩවියේ ප්‍රකාශයක් නිකුත් කරමින් කියා සිටියේය.
එක්සත් ජනපදයේ රෝග පාලනය සහ වැළැක්වීමේ මධ්‍යස්ථාන (CDC) පසුගිය සතියේ පැවසුවේ ජූනි 4 වනවිට ඇමෙරිකාව තුළ වෛරස් රෝගීන්ගෙන් BA.4 සහ BA.5 ප්‍රභේදවල ආසාදිතයන් පිළිවෙලින් 5%ක් සහ 8%ක් පමණ වනු ඇතැයි ගණන් බලා ඇති බවයි.