ජනාධිපති රනිල් වික්‍රමසිංහගේ ප්‍රධානත්වයෙන් ආණ්ඩු පක්ෂයේ මන්ත්‍රී කණ්ඩායමේ විශේෂ රැස්වීමක් අද (26) පස්වරුවේ පැවැත්වීමට නියමිතය.
රනිල් වික්‍රමසිංහ ජනාධිපති ධුරයට පත් වීමෙන් පසු ආණ්ඩු පක්ෂයේ මන්ත්‍රී කණ්ඩායම රැස්වන පළමු අවස්ථාව මෙය වන අතර හෙට (27) විශේෂ පාර්ලිමේන්තු දිනයක් ලෙස ප්‍රකාශයට පත් කර තිබේ.
දැනට ක්‍රියාත්මක හදිසි නිතී රෙගුලාසිවලට අදාළ පාර්ලිමේන්තු විවාදය වෙනුවෙන් මෙය ප්‍රකාශයට පත් කර ඇති අතර හදිසි නීතිය ප්‍රකාශයට පත් කර දින 14ක් ඇතුළත ඒ සඳහා පාර්ලිමේන්තු අනුමැතිය ලබා ගත යුතුය.
ඒ සඳහා වන විවාදය හෙට (27) උදෑසන 10 සිට පස්වරු 4.30 දක්වා පැවැත්වේ. දිවා විවේකයෙන් තොරව හෙට පාර්ලිමේන්තු විවාදය පැවැත්වීම කෙරෙහි අවධානය යොමුව ඇති බවට තොරතුරු වාර්තා වෙයි.