22 වන ආණ්ඩුක්‍රම ව්‍යවස්ථා සංශෝධනය සම්මත වීමත් සමඟ ජනාධිපතිවරයාගේ සහ අග්‍රාමාත්‍යවරයාගේ බලතල බෙදී යන බව විදේශ අමාත්‍ය අලි සබ්රි පවසයි.
අමාත්‍යවරයා මේ බව ප්‍රකාශ කළේ අද (05) කොළඹදී පැවති මාධ්‍ය හමුවකට එක්වෙමිනි.
ආණ්ඩුක්‍රම ව්‍යවස්ථාවේ 19 වැනි සංශෝධනයෙන් හඳුන්වා දුන් බොහෝ ව්‍යුහයන් 22 වැනි ආණ්ඩුක්‍රම ව්‍යවස්ථා සංශෝධනය සම්මත වූ විට ආපසු හැරෙනු ඇත.
වත්මන් ජනාධිපතිවරයාට කලින් සැලසුම් කර තිබූ අන්තර්වාර වැඩපිළිවෙළ එලෙසම තබා ගැනීමට අවශ්‍ය නොවන බවත් 19 වැනි සංශෝධනය සම්පූර්ණයෙන්ම ක්‍රියාත්මක කිරීමට අවශ්‍ය බවත් ඔහු ප්‍රකාශ කළේය.
මතභේදයට තුඩු දී ඇති ත්‍රස්තවාදය වැළැක්වීමේ පනත වෙනුවට ජාත්‍යන්තර සහ කලාපීය වශයෙන් පිළිගත් හොඳම භාවිතයන්ට අනුකූලව ජාතික ආරක්ෂාව, මානව හිමිකම් සහ මානව නිදහස සමතුලිත කිරීම සඳහා නව නීතියක් ගෙන ඒමට ශ්‍රී ලංකාව සූදානම් වන බව ඔහු පැවසීය.