ආර්ථික අර්බුදයෙන් ගොඩ ඒම සඳහා දැඩි තීරණවලට එළැඹීමට සිදු වන බවත් ජාත්‍යන්තර මූල්‍ය අරමුදල හැර අපට වෙනත් විකල්පයක් නොමැති බවත් මහ බැංකු අධිපති ආචාර්ය නන්දලාල් වීරසිංහ පැවසීය.
මහබැංකු අධිපතිවරයා මේ බව සඳහන් කළේ ජනාධිපති මාධ්‍ය අධ්‍යක්ෂ ජනරාල් ධනුෂ්ක රාමනායක සමග පැවති සම්මුඛ සාකච්ඡාවකට එක්වෙමිනි.
බදු සංශෝධන, පොලී අනුපාතික ඉහළ නැංවීම ආදිය උද්ධමනකාරී වාතාවරණයෙන් මිදීම සඳහා ගත් දැඩි තීරණ කිහිපයක් බව පැවසූ මහබැංකු අධිපතිවරයා කියා සිටියේ වත්මන් බදු ප්‍රතිපත්තිය අවම වශයෙන් වසරක කාලයක් ක්‍රියාත්මක කළහොත් ලබන වසරේ සිට බලාපොරොත්තු වන අයුරින් ආර්ථිකය ස්ථාවර වන බවයි.
එමෙන්ම අප සිතනවාට වඩා බදු ආදායම ඉහළ යන බවත් වැඩි ආදායම් ලබන අයට වැඩි දායකත්වයක් ලබාදීම තුළින් අඩු ආදායම් ලබන අයට සහනයක් ලැබෙන බවත් මහබැංහු අධිපතිවරයා පැවසීය.