පසුගිය මැයි 09 වැනිදා සිදුවූ කලහකාරී සිදුවීම් පාලනය කිරීමට අපොහොසත් වූ බවට චෝදනා කරමින් ස්ථාන මාරුවීම් ලැබූ ප්‍රධාන පොලිස් පරීක්ෂකවරුන් 14 දෙනෙක් අද (21) ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් ගොනු කර තිබේ.
ඔවුන් සිය පෙත්සම් මගින් පෙන්වා දී ඇත්තේ තෝරාගත් පිරිසකට පමණක් මාරුවීම් ලබාදී ඇති බවත්, මාරුවීම් සිදුකර ඇත්තේ දේශපාලන අවශ්‍යතාවන් පදනම් කරගනිමින් බවත්ය.
පසුගිය මැයි 09 වැනිදා දිවයින පුරා මහත් මහජන කලබල ඇති වූ අතර කලහකාරී සිද්ධීන්ද කිහිපයක්ම වාර්තා විය. ඒ අනුව වහාම ක්‍රියාත්මක වූ පොලිස්පතිවරයා පසුගිය මස 20 වැනිදා සිට ක්‍රියාත්මක වන පරිදි ස්ථානාධිපතිවරුන් 23 දෙනෙක් මාරු කර යැවීමට කටයුතු කළේය. ඒ කලහකාරී සිදුවීම් වැළැක්වීමට කටයුතු නොකළ බවට චෝදනා කරමින්.
පොලිස්පතිවරයා, මහජන ආරක්ෂක අමාත්‍යාංශයේ ලේකම්වරයා, පොලිස් විශේෂ විමර්ශන අංශයේ අධ්‍යක්ෂවරයා සහ නීතිපතිවරයා ඇතුලු පිරිසක් වගඋත්තරකරුවන් කරමින් ඔවුන් මෙම පෙත්සම් ගොනු කර තිබේ.