විශේෂ ආරක්ෂාවක් යටතේ හෙලිකොප්ටරයකින් රැගෙන ආ ප්‍රභූවරයෙක් කොළඹ ජාතික රෝහලේ දැඩි සත්කාර ඒකකයට ඇතුළත් කර ඇති බව වාර්තා වෙයි.
මේ වන විට ඔහුට ප්‍රතිකාර ලබාදෙමින් සිටින අතර රෝගියෙකු රෝහලට ඇතුළත් කිරීමේදී අනුගමනය කරනු ලබන ක්‍රියාපටිපාටිවලින් බැහැරව, කිසිදු ලේඛනයක හෝ සටහන් නොතබා මෙම විශේෂ ප්‍රභූවරයා කොළඹ ජාතික රෝහලට ඇතුළත් කර තිබීම දැඩි කතාබහට ලක් වී තිබේ.
එසේම මෙම ඇතුළත් කිරීමේ තවත් විශේෂත්වයක් වන්නේ මෙම රෝගීයා වෙනුවෙන් කොළඹ ජාතික රෝහලේ වෛද්‍යවරුන් යොමු නොකොට වෙනත් විශේෂඥ වෛද්‍යවරුන් කණ්ඩායමක් විවිධ රෝහල්වලින් ගෙන්වා ප්‍රතිකාර සදහා යොමු කර තිබීමයි.
තවද මෙම ප්‍රභූවරයා රෝහලට ඇතුළත් කිරීමෙන් පසු රෝහල් පරිශ්‍රයේ ආරක්ෂක සෙබලුන් රඳවමින් විශේෂ ආරක්ෂාවක්ද සපයා තිබේ.
කෙසේවෙතත් මෙම විශේෂ ප්‍රභූවරයා කවුරුන්ද යන්න පිළිබඳව සොයා බැලීමේදී අනාවරණය වූයේ ඔහු හිටපු නාවුක හමුදාපතිවරයකු බවයි.